Давлатимиз раҳбарининг "Маҳаллаларда ёшлар билан ишлаш тизимини тубдан такомиллаштириш чора-тадбирлари тўғрисида"ги қарорига биноан маҳалла ёшлари етакчиси лавозимида ўз фаолиятини юритиб келаётган Миллий гвардия ҳарбий хизматчи ва ходимлари иштирокида видеоселектор йиғилиши бўлиб ўтди
Бугунги кунда Ўзбекистон Республикаси Миллий гвардияси ва Ёшлар ишлари агентлиги билан ҳамкорликда ёшларни ҳарбий ватанпарварлик руҳида тарбиялаш, ёшларга оид давлат сиёсатини юритиш, ёшларни муаммо ва таклифларини ижобий ҳал этиш ҳамда уларга етарли шарт-шароитлар яратиб бериш бўйича ҳамкорликдаги тизимли ишлар йўлга қўйилди.
Ушбу масалалар юзасидан Миллий гвардия қўмондони ўринбосари полковник С.Мамаюсупов раислигида республикамиз бўйлаб Миллий гвардия тизимидан маҳалладаги ёшлар етакчиси лавозимига сафарбар этилган 36 нафар ҳарбий хизматчи ва ходимлар иштирокида видеоселектор йиғилиши ўтказилди.
Йиғилишда маҳалладаги ёшлар етакчиларининг асосий вазифалари, уларга бериладиган имтиёзлар ҳамда рағбатлантиришлар бўйича маълумотлар етказилди.
Қарор билан намуна бўлаётган Етакчилар "Янги Ўзбекистон ислоҳотчиси" кўкрак нишони билан тақдирланиши алоҳида таъкидлаб ўтилди.
Шунингдек, бугунги кунда ўз фаолиятини маҳалла ёшлари етакчиси лавозимида давом эттириб келаётган ҳарбий хизматчи(ходим)лар доимо Миллий гвардия қўмондонлиги эътиборида бўлиши тушунтириб ўтилди. Йиғилиш якунида барча ёшлар етакчиларига масъулиятли ва шарафли хизматлари мобайнида куч-қувват, метин ирода, мустаҳкам соғлик ва улкан зафарлар тилаб, ҳамкорликдаги ишларни юқори босқичга олиб чиқишларига тавсиялар берилди.
