18 noyabr - Davlat bayrog‘i qabul qilingan kun munosabati bilan, "Eng ilg‘or Faxriy qorovul vzvodi" musobaqasi o‘tkazildi
Kuni kecha O‘zbekiston Respublikasi Qurolli Kuchlari kuch tuzulmalari o‘rtasida maxsus saf tayyorgarlik bo‘yicha “Eng ilg‘or faxriy qorovul vzvodi” ko‘rik tanlovi o‘tkazildi. Unda O‘zbekiston Respublikasi Milliy gvardiyasi, Mudofaa vazirligi, Ichki ishlar vazirligi, Chirchiq oliy tank qo‘mondonlik-muhandislik bilim yurti, Jamoat xavfsizligi universiteti tizimidagi harbiy xizmatchi va xodimlar, kursantlar hamda muddatli harbiy xizmatchilardan tashkil topgan 8 ta jamoa 3 shart bo‘yicha o‘zaro bellashdi.
Ushbu ko‘rik tanlovdan ko‘zlangan maqsad Qurolli Kuchlar tizimidagi faxriy qorovul shaxsiy tarkibining kasbiy tayyorgarligini takomillashtirish, maxsus saf tayyorgarlikdan amaliy ko‘nikmalarini mustahkamlash, ular orasida sog‘lom raqobatni rivojlantirish, o‘zaro tajriba almashish, shuningdek, shaxsiy tarkibning qurol bilan maxsus saf usullarini bajarishda o‘ziga nisbatan ishonchni oshirish bilan bir qatorda o‘z kasbiga bo‘lgan fidoyilik va sadoqatni oshirishdan iborat.
Ushbu ko‘rik tanlov 2005 yildan buyon tor doirada, Milliy gvardiya tizimida o‘tkazib kelingan bo‘lib, bu yil ushbu tanlov yangi bosqichga olib chiqildi va kuch tuzulmalarining faxriy qorovul vzvodlari ham ishtirok etdi. Jamoalar qurol bilan maxsus saf usullarini bajarish, qurol bilan tantanali o‘tish, saf qo‘shig‘ini ijro etgan holda tantanali o‘tish shartlari bo‘yicha o‘z mahoratlarini hakamlar hayʼati aʼzolari va tomoshabinlar eʼtiboriga havola etdilar. Jamoalarning chiqishlarini baholashda asosan ular tomonidan xavfsizlik qoidalariga amal qilish, shartlarga kreativlik va yangicha usullar bilan yondoshishlik, maxsus saf usullarini sinxronlik asosida hamjixatlik bilan bajarishlarini inobatga olgan holda baholandi.
Yakuniy natijalarga ko‘ra birinchi o‘rinni Milliy gvardiya jamoasi egallagan bo‘lsa, ikkinchi o‘rin Mudofaa vazirligi jamoasiga, uchinchi o‘rin esa Jamoat xavfsizligi universiteti kursantlari jamoasiga nasib etdi va g‘olib hamda faol ishtirok etgan jamoalar diplom, esdalik hamda qimmatbaho sovg‘alar bilan taqdirlandi.
Qurʼa tashlash natijalariga ko‘ra kuch tuzilmalari o‘rtasida o‘tkazilishi anʼanaga aylantirilishi ko‘zda tutilgan ushbu ko‘rik tanlovning navbatdagi mezboni etib Chirchiq oliy tank qo‘mondonlik-muhandislik bilim yurti tanlandi.
