O‘zbekiston Respublikasi Bosh vaziri raisligida 2023 yil 28 yanvar kuni "Respublika aholisi va hududlarini toshqin suvlari, sel oqimlari, ko‘chki hodisalari xavfi bilan bog‘liq favqulodda vaziyatlardan muhofaza qilish bo‘yicha 2022 yilda amalga oshirilgan ishlar va 2023 yildagi ustuvor vazifalar to‘g‘risida"gi videoselektor yig‘ilishida qo‘yilgan topshiriqlar ijrosini taʼminlash maqsadida Milliy gvardiya qo‘mondoni birinchi o‘rinbosari polkovnik I.Ibragimov, FVV masʼul xodimi Favqulodda vaziyatlar vazirligi boshqarma boshlig‘i o‘rinbosari polkovnik U.Yakubov, viloyat Toshqinga qarshi komissiya ishchi guruh vakillari tomonidan Farg‘ona viloyati hududidagi sel suv toshqin xavfi mavjud hududlar o‘rganilmoqda.

Xususan, Farg‘ona tumani Oqtom MFY Oqtom-1, Oqtom-2 selxonalari, Farg‘ona tumani Vodil gidrouzeli, Qo‘rg‘ontepa sel dambasi, Oqbilol sel ombori, Shohimardonsoy, Marg‘ilonsoy, Oltiariqsoy daryo o‘zanlari, Oqtepa va Choltagi sel yo‘llari, Vodil gidrouzeli(suv taqsimlash inshooti), "Oqbilol sel ombori" holatlari tekshirildi.

O‘rganishlar davomida ishchi guruh tomonidan daryo o‘zanlari qirg‘oqlari holati sel, suv toshqini mavsumida favqulodda vaziyatlarga tayyorgarligi, gidrotexnik inshootlarning aloqa vositalarining sozligi, navbatchilik olib borish tartibi, zaxira elektr manbalari mavjudligi, selxona va sel omborlarining sel, suv toshqinlarini betalafot qabul qilib olishi, tozalanganligi alohida eʼtibor qaratilib, mavjud kamchiliklar bo‘yicha masʼul xodimlarga tegishli ko‘rsatmalar berildi.