FARG‘ONA VILOYATIDA “YОSh GVARDIYACHI” HARBIY-SPORT MUSOBAQASI O‘TKAZILDI
Biz bugun katta g‘urur va iftixor bilan ayta olamizki, yoshlarimiz uchun mamlakatimiz Qurolli Kuchlari safida xizmat qilish yuksak maqsadga va tom maʼnodagi shon-sharaf ishiga aylandi.
Joriy yilning 26 aprel kuni Milliy gvardiya Farg‘ona viloyati bo‘yicha boshqarmasiga biriktirilgan, kelgusida hayotini harbiy kasbga baxshida etishni niyat qilgan vatanparvarlikka ixtisoslashtirilgan umumiy o‘rta taʼlim maktablarining o‘quvchilari o‘rtasida “Yosh gvardiyachilar” tanlovi o‘tkazildi.
Musobaqaning tashkillashtirilishidan ko‘zlangan asosiy maqsad
yoshlarni milliy, umuminsoniy qadriyatlar hamda Vatanga muhabbat ruhida tarbiyalash, o‘quvchi yoshlarni harbiy xizmatga tayyorlash, chaqiruvga qadar boshlang‘ich tayyorgarlik ishlarini yaxshilash, ularni sportga keng jalb etish va intellektual hamda jismonan rivojlangan barkamol avlod etib tarbiyalash.
Musobaqada Qo‘qon shahrida joylashgan 33-sonli, Oltiariq tumanida joylashgan 14-sonli va Beshariq tumanida joylashgan 15-sonli umumiy o‘rta taʼlim maktab jamoalari bahslashishdi. Umumiy natijalar yakuniga ko‘ra, 15-sonli umumtaʼlim maktab jamoasi faxrli birinchi o‘rinni egallab tanlovning respublika bosqichiga yo‘llanmani qo‘lga kiritdi.
