Farg‘ona viloyatida olib borilgan hamkorlikdagi tezkor tadbirlar natijasida bir qator jinoyatlar fosh etildi
Joriy yilning 30 iyul kuni Marg‘ilon shahrida yashovchi fuqaro A.B. “102”ga murojaat qilib, nomaʼlum fuqaro unga tegishli bo‘lgan “Redmi 9” rusumli uyali telefonini o‘g‘irlab ketganini maʼlum qildi.
IIB va Milliy gvardiya xodimlari tomonidan amalga oshirilgan tezkor tadbir natijasida ushbu jinoyatni sodir etishda gumonlanuvchi shaxs aniqlanib, qo‘lga olindi. Surishtiruv davomida huquqbuzar Farg‘ona shahrida yashovchi 31 yoshli A.F. ekanligi maʼlum bo‘ldi.
Hozirda holat yuzasidan tergov harakatlari olib borilmoqda.
Farg‘ona viloyatida, Davlat xavfsizlik xizmati, IIB va Milliy gvardiya xodimlari hamkorligida o‘tkazilgan tezkor tadbir natijasida giyohvandlik vositalarining noqonuniy aylanmasi bilan shug‘ullangan shaxslar aniqlandi.
Mazkur tadbir, joriy yilning 1 avgust kuni Qo‘qon shahrida olib borildi va unda 32 yoshli M.A. va 35 yoshli P.A.lar 500 grammdan ortiq giyohvandlik moddasini sotmoqchi bo‘lgan vaqtda ashyoviy dalillar bilan qo‘lga olindi. Fuqaro M.A. ning xonadoni o‘rnatilgan tartibda ko‘zdan kechirilganda, og‘irligi 2100 grammdan ortiq giyohvandlik moddasi, elektron tarozi va ko‘z yoshlantiruvchi gazli aerozol idishlari saqlab kelinganligi aniqlandi.
Hozirda holat yuzasidan tergov harakatlari davom ettirilmoqda.
Shuningdek, 1 avgust kuni Bojxona boshqarmasi, Davlat xavfsizlik xizmati va Milliy gvardiya xodimlari hamkorligida olib borilgan tezkor tadbirda, tarkibida biologik faol moddalar bo‘lgan vositalarni noqonuniy olib o‘tishda gumon qilingan shaxslar aniqlandi. Dang‘ara tumanida yashovchi 39 yoshli M.M.ning xonadonida o‘tkazilgan tintuv davomida hech qanday hujjatlarga ega bo‘lmagan, umumiy qiymati 797 million 500 ming so‘mlik “Honeymoon” dori vositalari topilib, musodara qilindi.
Mazkur holat yuzasidan tergov harakatlari olib borilmoqda.
