Жорий йилнинг 30 июль куни Марғилон шаҳрида яшовчи фуқаро A.Б. «102»га мурожаат қилиб, номаълум фуқаро унга тегишли бўлган “Redmi 9” русумли уяли телефонини ўғирлаб кетганини маълум қилди.

ИИБ ва Миллий гвардия ходимлари томонидан амалга оширилган тезкор тадбир  натижасида ушбу жиноятни содир этишда гумонланувчи шахс аниқланиб, қўлга олинди. Суриштирув давомида ҳуқуқбузар Фарғона шаҳрида яшовчи 31 ёшли A.Ф. эканлиги маълум бўлди.

Ҳозирда ҳолат юзасидан тергов ҳаракатлари олиб борилмоқда.

Фарғона вилоятида, Давлат хавфсизлик хизмати, ИИБ ва Миллий гвардия  ходимлари ҳамкорлигида ўтказилган тезкор тадбир натижасида гиёҳвандлик воситаларининг ноқонуний айланмаси билан шуғулланган шахслар аниқланди.

Мазкур тадбир, жорий йилнинг 1 август куни Қўқон шаҳрида олиб борилди ва унда  32 ёшли М.A. ва 35 ёшли П.A.лар 500 граммдан ортиқ гиёҳвандлик моддасини сотмоқчи бўлган вақтда ашёвий далиллар билан қўлга олинди. Фуқаро М.A. нинг хонадони ўрнатилган тартибда кўздан кечирилганда,  оғирлиги 2100 граммдан ортиқ гиёҳвандлик моддаси, электрон тарози ва кўз ёшлантирувчи газли аэрозол идишлари сақлаб келинганлиги аниқланди.  

Ҳозирда ҳолат юзасидан тергов ҳаракатлари давом эттирилмоқда.

Шунингдек, 1 август куни Божхона бошқармаси, Давлат хавфсизлик хизмати ва Миллий гвардия ходимлари ҳамкорлигида олиб борилган тезкор тадбирда, таркибида биологик фаол моддалар бўлган воситаларни ноқонуний олиб ўтишда гумон қилинган шахслар аниқланди. Данғара туманида яшовчи 39 ёшли M.M.нинг хонадонида ўтказилган тинтув давомида ҳеч қандай ҳужжатларга эга бўлмаган, умумий қиймати 797 миллион 500 минг сўмлик «Honeymoon» дори воситалари топилиб, мусодара қилинди. 

Мазкур ҳолат юзасидан тергов ҳаракатлари олиб борилмоқда.