O‘zbekiston Respublikasi Qurolli kuchlari tuzilmalarida bugunda faxriylar kengashlari faoliyati yo‘lga qo‘yilgan bo‘lib, ular ustoz-shogird anʼanalarini davom ettirgan holda yosh mutaxassislarga o‘z tajribalarini berish bilan birga yoshlarni vatanparvarlik ruhida tarbiyalashga o‘z hissalarini qo‘shib kelishmoqda.

Shu maqsadda Milliy gvardiya tizimida ham faxriylar kengashini faoliyatini yo‘lga qo‘yish borasida bir qator vazirliklar va boshqa tashkilotlarning bugunda samarali ishlab kelayotgan faxriylar kengashlarining vakillari hamda hududlardagi boshqarmalar faxriylari ishtirokida videokonferensaloqa orqali seminar o‘tkazildi.

Unda faxriylarning boy malaka va tajribalarini yosh avlodga o‘rgatib borishlarida ular o‘rtasida doimiy muloqot muhitini yo‘lga qo‘yish va sharoitlar yaratish, faxriylarning tibbiy, ijtimoiy himoyasini taʼminlash to‘g‘risida so‘z yuritildi.

Tadbirda faxriylar kengashlari Milliy gvardiya taʼlim muassasalari, biriktirilgan maktab va litseylar o‘quvchilari, “Mehribonlik uylari” tarbiyalanuvchilarini vatanparvarlik ruhida tarbiyalash va kasbga yo‘naltirishda muhim ahamiyat kasb etishi taʼkidlandi.

Shuningdek, ularni rag‘batlantirish va madaniy-hordiq chiqarishlarini taʼminlash ishlari yo‘lga qo‘yilishi qayd etildi. Albatta mazkur faxriylar kengashlari kelgusida o‘z faoliyati bilan jamiyatimizda, qolaversa harbiy qism va muassasalarda sog‘lom muhitni shakllantirib,yoshlar uchun hayotiy ibrat namunasi bo‘ladi.