Mamlakatimiz bo‘ylab Milliy gvardiya hududiy bo‘linmalari va joylardagi huquqni muhofaza qilish organ xodimlari hamkorligida mahalla kesimida aholi o‘rtasida jinoyatchilikning oldini olish va unga qarshi kurashish borasidagi profilaktik chora tadbirlar amalga oshirib kelinmoqda.

Shuningdek, Milliy gvardiya va IIV rasmiy kanallarida yurtdoshlarimizni firibgarlardan ogohlantirish maqsadida berib borilayotgan xabarlariga qaramasdan ayrim fuqarolarning yolg‘on vaʼdalar beruvchi shaxslarga aldanib qolayotganliklari kuzatilmoqda.

Xususan, olingan va o‘rganilgan maʼlumotlarga ko‘ra 2020 yilning sentyabr oyida Qo‘shtepa tumani Bog‘ishamol ko‘chasida yashovchi 1970 yilda tug‘ilgan fuqaro F.Yu., Marg‘ilon shahrida yashovchi 1990 yilda tug‘ilgan fuqaro A.Q.ning ishonchiga kirib, tanishlari orqali Milliy gvardiyaga ishga kiritib qo‘yishni vaʼda bergan holda undan 24 150 000 so‘m pulni olib, o‘z ehtiyojlariga ishlatib yuborgani va shu kungacha yashirinib yurgani maʼlum bo‘lgan.

Mazkur holat yuzasidan tezkor tadbir amalga oshirilib, fuqaro F.Yu.ga nisbatan O‘zbekiston Respublikasi JK ning 168-moddasi 1-qismi bilan jinoyat ishi qo‘zg‘atilib, hozirda Farg‘ona viloyati IIB tomonidan tergov ishlari olib borilmoqda.

Hurmatli fuqarolar pul evaziga qaysi sohaga bo‘lishdan qatʼiy nazar ishga yoki o‘qishga kiritib qo‘yaman deb yolg‘on vaʼda beruvchilarga ishonib qolmang.

Shunday insonlar uchrab qolsa quyidagi ko‘rsatilgan telefon raqamlariga qo‘ng‘iroq qilib murojaat qilishingiz mumkin.