Fuqarolarga tan jarohati yetkazgan erkak qo‘lga olinib, Ichki ishlar organlariga topshirildi
Sirdaryo viloyati “Qo‘riqlash” boshqarmasi Monitoring markaziga Sayxunobod tumani “Turon” mahallasidagi xonadonlarning biridan “tashvish” xabari kelib tushgan.
Voqea joyiga zudlik bilan tuman “Qo‘riqlash” bo‘limi xodimlari yetib borgan.
Xodimlar xonadonga kirgan vaqtda pichoq bilan jarohatlangan ikki ayol va qo‘lida oshxona pichog‘i ushlagan erkak bo‘lgan.
Fuqaro tezkorlik bilan qurolsizlantirilib, hibsga olingan va tez yordam kelgunga qadar ayollarga birinchi tibbiy yordam ko‘rsatilgan. Shundan so‘ng, holat yuzasidan Sayxunobod tumani IIBga xabar berilgan.
Dastlabki surishtiruv ishlarida huquqbuzar 35 yoshli Sh.Yo., jabrlanuvchilar: fuqaro Sh.Yo bilan shar’iy nikohda bo‘lgan 33 yoshli B.M. va uning tanishi 34 yoshli X.N ekanligi aniqlangan.
Hozirda mazkur holat yuzasidan tergov harakatlari tuman IIB tomonidan olib borilmoqda.