Funksional koʻp kurash boʻyicha Milliy gvardiya birinchiligi boʻlib oʻtdi.
Milliy gvardiyaning hududiy boshqarmalaridan kelgan 6 ta jamoa funksional koʻp kurash (krossfit) boʻyicha oʻtkazilgan birinchilik musobaqalarida ishtirok etdi. Unda 17 nafar gvardiyachi oʻzining chidamliligi, kuchi va tezligini namoyon qilib, yuqori sport ruhida kurash olib bordi.
Musobaqa doirasida jamoalar uchta murakkab mashqlar majmuasini bajarishdi. Ushbu mashqlar gvardiyachilarning umumiy jismoniy tayyorgarligini, koordinatsiyasini va funksional imkoniyatlarini aniqlashga qaratilgan boʻlib, bellashuvlar nihoyatda shiddatli va hayajonli kechdi.
Musobaqa natijalariga koʻra, 1-oʻrin — Toshkent shahar jamoasiga, 2-oʻrin — Qoraqalpogʻiston Respublikasi jamoasiga, 3-oʻrin esa — jamoat xavfsizligi universiteti jamoasiga nasib etdi.
Mazkur sport tadbiri gvardiyachilarning jismoniy tayyorgarligini yanada mustahkamlash, sogʻlom raqobat muhitini shakllantirish, shuningdek, boʻlinmalar oʻrtasida sport madaniyatini yuksaltirishga xizmat qildi.
