FUQAROLARGA RUHIY KO‘MAK BERILMOQDA
Milliy gvardiya Buxoro viloyati Qo‘riqlash boshqarmasi Romitan tumani bo‘limi psixolog mutaxassislari tomonidan tumanda istiqomat qiluvchi fuqarolarga ruhiy ko‘mak berish ishlari yo‘lga qo‘yilgan. Xususan, kuni kecha tumanning “Afrosiyob”, “Tarnaut” hamda "Ibn Sino" mahallalarida bo‘lib o‘tgan navbatdagi suhbatlar jarayonida fuqarolarning muammolari aniqlanib, ruhiy barqarorlikni taʼminlovchi psixokorreksion mashqlar o‘tkazildi.
Suhbat davomida, “Shaxs, shaxsning individual-psixologik xususiyatlari”, “Oilaviy munosabatlar va oilaviy ziddiyatlar” mavzularida, shuningdek fuqarolarning ichki dunyosi, ruhiyati, og‘ir vaziyatga tushish sabablari, huquqbuzarlik yoki jinoyat sodir etishga moyilligi va boshqa omillar aniqlanib, zarur tavsiyalar berildi. Shuningdek, uchrashuv davomida aholi o‘rtasida asossiz va salbiy axborotlar tarqalishini oldini olish, fuqarolar, ayniqsa, yoshlarning ahloqiy-ruhiy holatini barqarorlashtirishga qaratilgan psixologik trening, mashq va motivatsion tadbirlar tashkil etildi.
Malakali psixologlar tomonidan o‘tkazilgan nazariy va amaliy mashg‘ulotlar fuqarolarda katta qiziqish uyg‘otganligi sababli, psixologlarga sohaga oid ko‘plab savollar bilan murojaat qilishdi va albatta batafsil javob oldilar.
Eʼtirof etish joizki, Milliy gvardiya xodimlari, ayniqsa psixolog mutaxassislar kasbiy faoliyatida turli toifadagi fuqarolar bilan shaxslararo munosabatga kirishadilar. Shu bois, fuqarolar bilan amalga oshirilayotgan bu kabi amaliy mashg‘ulotlar kelgusida o‘zining ijobiy samarasini berishi, shubhasiz.
