ФУҚАРОЛАРГА РУҲИЙ КЎМАК БЕРИЛМОҚДА
Миллий гвардия Бухоро вилояти Қўриқлаш бошқармаси Ромитан тумани бўлими психолог мутахассислари томонидан туманда истиқомат қилувчи фуқароларга руҳий кўмак бериш ишлари йўлга қўйилган. Хусусан, куни кеча туманнинг "Афросиёб", "Тарнаут" ҳамда "Ибн Сино" маҳаллаларида бўлиб ўтган навбатдаги суҳбатлар жараёнида фуқароларнинг муаммолари аниқланиб, руҳий барқарорликни таъминловчи психокоррекцион машқлар ўтказилди.
Суҳбат давомида, “Шахс, шахснинг индивидуал-психологик хусусиятлари”, “Оилавий муносабатлар ва оилавий зиддиятлар” мавзуларида, шунингдек фуқароларнинг ички дунёси, руҳияти, оғир вазиятга тушиш сабаблари, ҳуқуқбузарлик ёки жиноят содир этишга мойиллиги ва бошқа омиллар аниқланиб, зарур тавсиялар берилди. Шунингдек, учрашув давомида аҳоли ўртасида асоссиз ва салбий ахборотлар тарқалишини олдини олиш, фуқаролар, айниқса, ёшларнинг аҳлоқий-руҳий ҳолатини барқарорлаштиришга қаратилган психологик тренинг, машқ ва мотивацион тадбирлар ташкил этилди.
Малакали психологлар томонидан ўтказилган назарий ва амалий машғулотлар фуқароларда катта қизиқиш уйғотганлиги сабабли, психологларга соҳага оид кўплаб саволлар билан мурожаат қилишди ва албатта батафсил жавоб олдилар.
Эътироф этиш жоизки, Миллий гвардия ходимлари, айниқса психолог мутахассислар касбий фаолиятида турли тоифадаги фуқаролар билан шахслараро муносабатга киришадилар. Шу боис, фуқаролар билан амалга оширилаётган бу каби амалий машғулотлар келгусида ўзининг ижобий самарасини бериши, шубҳасиз.
