HARBIY QISMNING YANGI MAʼMURIY BINOSI FOYDALANISHGA TOPSHIRILDI
Milliy gvardiyaning Toshkent shahar Mirzo-Ulug‘bek tumanida joylashgan harbiy qism maʼmuriy binosining kapital taʼmirdan chiqarilib, foydalanishga topshirilishi harbiylarimiz uchun chinakam bayramga aylandi desak adashmaymiz. Ayniqsa, mustaqilligimizning 30 yilligi arafasida jadal suratlarda olib borilgan bunyodkorlik ishlari natijasida qad roslagan, barcha zamonaviy sharoitlarga ega mazkur obyekt Vatanimizning shonli bayramiga munosib sovg‘a bo‘ldi.
Tantanali tadbirda Prezident xavfsizligi xizmati rahbar xodimlari, Toshkent shahar hokimi o‘rinbosari M.Muhiddinov, Mirzo-Ulug‘bek tumani hokimi Sh.Irgashev va Milliy gvardiya qo‘mondonligi, harbiy qism komandirlari, jamoatchilik vakillari hamda soha xodimlari ishtirok etdi.
Tadbirni o‘z nutqi bilan ochib bergan Milliy gvardiya qo‘mondoni, general-mayor R.Djurayev davlatimiz rahbari tomonidan harbiy sohaga qaratilayotgan alohida eʼtibor va olib borilayotgan tizimli kompleks chora-tadbirlar o‘zining ijobiy natijasini berayotganini taʼkidladi.
Shuningdek, Qo‘mondon Yangi O‘zbekistonni barpo etish va uchinchi “Renessans” poydevorini yaratishdek buyuk vazifalar strategik maqsad qilinib, asosiy urg‘u xalqimizni har tomonlama rozi qilish shu bilan birga, chuqur o‘ylangan ilm-fan, taʼlim, iqtisodiyot va maʼnaviy-maʼrifiy islohotlarni amalga oshirishga qaratilganligini eʼtirof etdi.
Shu bilan birga, bayramona ruhda o‘tgan tadbirda Milliy gvardiya qo‘mondonining buyrug‘iga ko‘ra xizmat faoliyati davomida yuqori natijalarga erishgan, fidoiy va jonkuyarligi bilan safdoshlariga namuna bo‘lib kelayotgan bir guruh harbiy xizmatchilarga “Maʼnaviyat aʼlochisi” ko‘krak nishoni, faxriy yorliq hamda harbiy unvonlar tantanali ravishda topshirildi va barcha sinovlardan muvaffaqiyatli o‘tgan bir qator harbiy xizmatchilarga “Alvon beret” kiyish huquqi berildi.
Yangi binodagi yangi imkoniyatlarning guvohi bo‘lgan mehmonlar tomonidan Milliy gvardiya harbiy xizmatchilarining yurtimiz tinchligi va fuqarolarimiz osoyishtaligini taʼminlashdek sharafli va masʼuliyatli xizmatni ado etish barobarida Prezidentimizga va xalqimizga sadoqat bilan xizmat qilishlariga yuksak ishonch bildirildi.
