HARBIY QISMDA BIR KUN !
O‘zbekiston Respublikasi Milliy gvardiyasi Qashqadaryo viloyati bo‘yicha boshqarmasiga qarashli harbiy qismda "Ochiq eshiklar kuni" munosabati bilan "Armiya xalq bilan bir tanu, bir jon" shiori ostida harbiy vatanparvarlik tadbiri tashkil etildi.
O‘zbekiston Respublikasi Yoshlar ishlari agentligi Qarshi shahar bo‘limi bilan hamkorlikda tashkil etilgan mazkur tadbirda, Qarshi shahridagi 45-sonli maktabning ixtisoslashtirilgan "Harbiy vatanparvarlik sinfi" o‘quvchilari hamda 10 dan ortiq mahallalarning uyushmagan yoshlari ishtirok etdilar. Harbiy qismga tashrif buyurgan yoshlar dastlab, harbiy qismda yaratilgan zamonaviy shart-sharoitlar, zirhli harbiy texnika vositalari hamda Milliy gvardiya tizimlarida foydalanilayotgan xizmat otlari va itlari saqlanadigan majmualar faoliyati bilan yaqindan tanishishdi.
Shundan so‘ng, o‘quvchi-yoshlar zamonaviy tartibda bunyod etilgan "Ot sporti" majmuasida mahorat darslarini o‘tayotgan “Qorabayir” zotli xizmat otlarining namoyishini kuzatdilar. Malakali mutaxassislar tomonidan noyob ot turlarini ko‘paytirish va Yurtimizda ot sportini rivojlantirish borasida amalga oshirilayotgan ishlar bo‘yicha qiziqarli maʼlumotlar berildi. Majmuada tashkil etilgan ot sporti o‘yinlari va ot ustidagi jangovar mashg‘ulotlar hamda "Kamondan otish" mashg‘ulotlari o‘quvchi yoshlarda katta taassurot qoldirdi.
Harbiy xizmatchilar tomonidan zamonaviy harbiy-taktik, jangovar harbiy chiqishlar ko‘rsatilib, unda asosiy eʼtibor yoshlarda harbiy xizmat ko‘nikmalarini shakllantirishga hamda ular qalbida harbiy vatanparvarlik tuyg‘ularini mustahkamlashga qaratilgani bilan ahamiyatlidir.
