ҲАРБИЙ ҚИСМДА БИР КУН !
Ўзбекистон Республикаси Миллий гвардияси Қашқадарё вилояти бўйича бошқармасига қарашли ҳарбий қисмда "Очиқ эшиклар куни" муносабати билан "Армия халқ билан бир тану, бир жон" шиори остида ҳарбий ватанпарварлик тадбири ташкил этилди.
Ўзбекистон Республикаси Ёшлар ишлари агентлиги Қарши шаҳар бўлими билан ҳамкорликда ташкил этилган мазкур тадбирда, Қарши шаҳридаги 45-сонли мактабнинг ихтисослаштирилган "Ҳарбий ватанпарварлик синфи" ўқувчилари ҳамда 10 дан ортиқ маҳаллаларнинг уюшмаган ёшлари иштирок этдилар. Ҳарбий қисмга ташриф буюрган ёшлар дастлаб, ҳарбий қисмда яратилган замонавий шарт-шароитлар, зирҳли ҳарбий техника воситалари ҳамда Миллий гвардия тизимларида фойдаланилаётган хизмат отлари ва итлари сақланадиган мажмуалар фаолияти билан яқиндан танишишди.
Шундан сўнг, ўқувчи-ёшлар замонавий тартибда бунёд этилган "От спорти" мажмуасида маҳорат дарсларини ўтаётган "Қорабайир" зотли хизмат отларининг намойишини кузатдилар. Малакали мутахассислар томонидан ноёб от турларини кўпайтириш ва Юртимизда от спортини ривожлантириш борасида амалга оширилаётган ишлар бўйича қизиқарли маълумотлар берилди. Мажмуада ташкил этилган от спорти ўйинлари ва от устидаги жанговар машғулотлар ҳамда "Камондан отиш" машғулотлари ўқувчи ёшларда катта таассурот қолдирди.
Ҳарбий хизматчилар томонидан замонавий ҳарбий-тактик, жанговар ҳарбий чиқишлар кўрсатилиб, унда асосий эътибор ёшларда ҳарбий хизмат кўникмаларини шакллантиришга ҳамда улар қалбида ҳарбий ватанпарварлик туйғуларини мустаҳкамлашга қаратилгани билан аҳамиятлидир.
