"IBRATLI OILA" KO‘RIK-TANLOVINING SIRDARYO VILOYATI BO‘YICHA BOSQICHI BO‘LIB O‘TDI
Harbiy xizmatchi va xodimlarning oila aʼzolarini ijodiy salohiyatini rivojlantirish hamda ularning oilalaridagi ijobiy hayotiy tajribasini ommalashtirish maqsadida Milliy gvardiya Sirdaryo viloyati bo‘yicha boshqarmasi hamda Qo‘riqlash boshqarmasi xodimlari o‘rtasida "Ibratli oila" ko‘rik- tanlovining viloyat bosqichi bo‘lib o‘tdi.
Tadbirda harbiy xizmatchilar orasida hurmat qozongan, jamiyatda istiqomat qilayotgan joylaridagi qo‘shnilari bilan yaxshi munosabat o‘rnata bilgan, farzand tarbiyasi masalasida boshqalarga o‘rnak bo‘la oladigan, har tomonlama ibratli, ko‘p yillik oilaviy tajribaga ega bo‘lgan oilalar: Kazakbayevlar, Suyunovlar, Ibragimovlar, Qurbonovlar hamda Roziqovlar oilalari ishtirok etishdi.
Qiziqarli hamda bugungi kundalik hayotda uchraydigan zamon illatlari, sharqona odob, qadriyatlarni namoyish etishga qaratilgan turli shartlardan o‘zlarining zukkoliklari bilan tadbirda uchinchi o‘rinni Suyunovlar oilasi, ikkinchi o‘rinni Roziqovlar oilasi qo‘lga kiritdi.
Yuksak bilimdonligi bobida boshqa jamoalarni ortda qoldirgan Qurbonovlar oilasi faxrli birinchi o‘rinni qo‘lga kiritib, keyingi bosqichga yaʼni, respublika bosqichiga yo‘llanmani qo‘lga kiritishdi.
G‘olib bo‘lgan hamda tadbirda faol ishtirok etgan oilalarga diplom hamda qimmatbaho esdalik sovg‘alari topshirildi.
