Inspektor-psixologlarning malakasi oshirilmoqda
Ma'lumki, Oʻzbekiston Respublikasi Prezidentining 2024-yil 5-fevraldagi “Voyaga yetmaganlar oʻrtasida qonunbuzarliklar profilaktikasi tizimini takomillashtirish boʻyicha qoʻshimcha chora-tadbirlar toʻgʻrisida”gi qaroriga muvofiq ichki ishlar organlarining inspektor-psixolog shtati Milliy gvardiyaga oʻtkazilgan edi.
Bugungi kunda Oʻzbekiston Respublikasi Milliy gvardiyasi rahbariyati tomonidan mazkur lavozimlarni jamlash, inspektor-psixologlar faoliyatini tashkil etishning tashkiliy-huquqiy asoslarini yaratish hamda ularning malakasini oshirish borasida muayyan ishlar amalga oshirib borilmoqda.
Xususan, joriy yilning 25-mart kunidan Oʻzbekiston Respublikasi Jamoat xavfsizligi universitetida hududiy boshqarmalardagi inspektor-psixologlarni oʻqitish boʻyicha onlayn oʻquv kursi oʻz faoliyatini boshladi. “Umumiy oʻrta maktab inspektor-psixologlari malakasini oshirish uchun moʻljallangan oʻquv kursi oʻquv dasturi” asosida tinglovchilarga “Psixologiya asoslari” yoʻnalishida “Inspektor-psixolog kasbiy faoliyatining me'yoriy-huquqiy va axloqiy-ruhiy tamoyillari”, “Yosh davrlari va taraqqiyot bosqichlarida pedagogik-psixologik munosabatlar”, “Yosh davrlarida inqirozli holatlarni aniqlash usullari. Inqirozlar psixoprofilaktikasi”, “Deviant xulq-atvor tiplari va xarakter aksentuatsiyasi”, “Additktiv xulq-atvor koʻrinishlari va addiksiyani aniqlash usullari”, “Psixologik portret tushunchasi. Psixologik portret tuzish amaliyoti” “Ota-onalar bilan manzilli ishlashning ijtimoiy-psixologik xususiyatlari”, “Oʻsmirlar oʻrtasida qonun buzilishlarini erta diagnostika qilish amaliyoti va psixoprofilaktikasi”, “Axborot xurujlari. Axborotning psixologik bosimida psixoprofilaktika” mavzularida, “Huquqiy tayyorgarlik” yoʻnalishida “Ma'muriy huquqbuzarlik va ma'muriy javobgarlik, ma'muriy jazo va uning qoʻllanilishi”, “Fuqarolarning huquq va erkinliklariga tajovuz qiladigan huquqbuzarliklar uchun ma'muriy javobgarlik”, “Ma'muriy huquqbuzarlik toʻgʻrisidagi ishlarni yuritish”, “Jinoyat tushunchasi va jinoyat tarkibi”, “Voyaga yetmaganlarning jinoiy javobgarligi”, “Voyaga yetmaganlarga tayinlanadigan jazolar” mavzularida mashgʻulotlar olib borilmoqda. Oʻzbekiston Respublikasi Jamoat xavfsizligi universiteti professor-oʻqituvchilari tomonidan olib borilayotgan mashgʻulotlarda tinglovchilarning mavzularga oid nazariy va amaliy bilim-koʻnikmalarini oshirishga alohida e'tibor qaratilmoqda.
