Инспектор-психологларнинг малакаси оширилмоқда
Маълумки, Ўзбекистон Республикаси Президентининг 2024 йил 5 февралдаги “Вояга етмаганлар ўртасида қонунбузарликлар профилактикаси тизимини такомиллаштириш бўйича қўшимча чора-тадбирлар тўғрисида”ги қарорига мувофиқ ички ишлар органларининг инспектор-психолог штати Миллий гвардияга ўтказилган эди.
Бугунги кунда Ўзбекистон Республикаси Миллий гвардияси раҳбарияти томонидан мазкур лавозимларни жамлаш, инспектор-психологлар фаолиятини ташкил этишнинг ташкилий-ҳуқуқий асосларини яратиш ҳамда уларнинг малакасини ошириш борасида муайян ишлар амалга ошириб борилмоқда.
Хусусан, жорий йилнинг 25 март кунидан Ўзбекистон Республикаси Жамоат хавфсизлиги университетида ҳудудий бошқармалардаги инспектор-психологларни ўқитиш бўйича онлайн ўқув курси ўз фаолиятини бошлади. “Умумий ўрта мактаб инспектор-психологлари малакасини ошириш учун мўлжалланган ўқув курси ўқув дастури” асосида тингловчиларга “Психология асослари” йўналишида “Инспектор-психолог касбий фаолиятининг меъёрий-ҳуқуқий ва ахлоқий-руҳий тамойиллари”, “Ёш даврлари ва тараққиёт босқичларида педагогик-психологик муносабатлар”, “Ёш даврларида инқирозли ҳолатларни аниқлаш усуллари. Инқирозлар психопрофилактикаси”, “Девиант хулқ-атвор типлари ва характер акцентуацияси”, “Аддитктив хулқ-атвор кўринишлари ва аддикцияни аниқлаш усуллари”, “Психологик портрет тушунчаси. Психологик портрет тузиш амалиёти” “Ота-оналар билан манзилли ишлашнинг ижтимоий-психологик хусусиятлари”, “Ўсмирлар ўртасида қонун бузилишларини эрта диагностика қилиш амалиёти ва психопрофилактикаси”, “Ахборот хуружлари. Ахборотнинг психологик босимида психопрофилактика” мавзуларида, «Ҳуқуқий тайёргарлик» йўналишида “Маъмурий ҳуқуқбузарлик ва маъмурий жавобгарлик, маъмурий жазо ва унинг қўлланилиши”, “Фуқароларнинг ҳуқуқ ва эркинликларига тажовуз қиладиган ҳуқуқбузарликлар учун маъмурий жавобгарлик”, “Маъмурий ҳуқуқбузарлик тўғрисидаги ишларни юритиш”, “Жиноят тушунчаси ва жиноят таркиби”, “Вояга етмаганларнинг жиноий жавобгарлиги”, “Вояга етмаганларга тайинланадиган жазолар” мавзуларида машғулотлар олиб борилмоқда. Ўзбекистон Республикаси Жамоат хавфсизлиги университети профессор-ўқитувчилари томонидан олиб борилаётган машғулотларда тингловчиларнинг мавзуларга оид назарий ва амалий билим-кўникмаларини оширишга алоҳида эътибор қаратилмоқда.
