O‘zbekiston Respublikasi Milliy gvardiyasi Xotin-qizlar jamoatchilik kengashi aʼzolari tomonidan hududiy bo‘linmalardagi boshlang‘ich tashkilotlarning faoliyati o‘rganilib, tizimda xizmat qilayotgan ayollar bilan ochiq muloqotlar o‘tkazish davomida harbiy xizmatchilarning oilalariga tashrif buyurildi.
Davlatimiz rahbarining "Oila va xotin-qizlar bilan ishlash, mahalla va nuroniylarni qo‘llab-quvvatlash tizimini takomillashtirish chora-tadbirlari to‘g‘risida"gi Farmoni hamda "Xotin-qizlarni qo‘llab-quvvatlash, ularning jamiyat hayotidagi faol ishtirokini taʼminlash tizimini yana-da takomillashtirish chora-tadbirlari to‘g‘risida " gi Qarori ijrosi yuzasidan Milliy gvardiya Xotin-qizlar jamoatchilik kengashi aʼzolari tomonidan hududiy bo‘linmalardagi boshlang‘ich tashkilotlarning faoliyati o‘rganilib, ularga yaqindan ko‘mak berilmoqda. 2021 yil va joriy yilning birinchi choragi davomida amalga oshirilgan ishlar bo‘yicha boshlang‘ich tashkilotlar aʼzolarining hisobotlari tinglandi.
Ayol harbiy xizmatchi va xodimalar tomonidan xotin-qizlar Kengashlariga muammolar yuzasidan qilgan murojaatlari, samarali yordam ko‘rsatish uchun qanday choralar ko‘rilayotgani, shu bilan bir qatorda, harbiy xizmatchilarining oila aʼzolari hamda "ayollar daftariga" kiritilgan ayollarning ehtiyojlari va manfaatlari qanday hal etilayotgani tahlil qilindi.
Tadbir davomida ayol-harbiy xizmatchi va xodimlar o‘rtasida intizom va qonuniylikni oshirish, Nizomning talablariga rioya qilish ishlariga alohida eʼtibor qaratildi.
Milliy gvardiya hududiy bo‘linmalari rahbarlari ishtirokidagi umumiy yig‘ilishlarda harbiy xizmatchilar va xotin-qizlarni ijtimoiy-huquqiy qo‘llab-quvvatlash masalalari muhokama qilindi.
Shuningdek, jamoalarda maʼnaviy-psixologik muhitni yaxshilash, oliy taʼlim olishda xotin-qizlarga har tomonlama ko‘maklashish, gender tengligini taʼminlash siyosatini davom ettirish, xotin-qizlarning ijtimoiy-siyosiy faolligini oshirish, ularga ijtimoiy-huquqiy, psixologik yordam ko‘rsatish bo‘yicha tushunchalar berilib, tizimda xizmat qilayotgan ayollardagi muammolarni o‘z vaqtida aniqlash yuzasidan vazifalar qo‘yildi.
Harbiy xizmatchi va ularning oila aʼzolari ishtirokida o‘tkazilgan ochiq muloqotlar mavjud bo‘lgan muammolarni joyida hal etish imkonini berdi. Ayrim murojaatlar bo‘yicha Xotin-qizlar jamoatchilik kengashi aʼzolari va Milliy gvardiya bo‘linmalari rahbariyati oldiga muammolarni hal etish choralari qo‘yilib, ularni ijro etish muddatlari belgilandi.
Bu kabi o‘tkazilayotgan ochiq muloqotlar Xotin-qizlar jamoatchilik kengashi aʼzolariga hududiy bo‘linmalardagi boshlang‘ich tashkilotlarning faoliyat samaradorligi to‘g‘risida xulosa chiqarish imkonini bermoqda.
