Ўзбекистон Республикаси Миллий гвардияси Хотин-қизлар жамоатчилик кенгаши аъзолари томонидан ҳудудий бўлинмалардаги бошланғич ташкилотларнинг фаолияти ўрганилиб, тизимда хизмат қилаётган аёллар билан очиқ мулоқотлар ўтказиш давомида ҳарбий хизматчиларнинг оилаларига ташриф буюрилди.
Давлатимиз раҳбарининг "Оила ва хотин-қизлар билан ишлаш, маҳалла ва нуронийларни қўллаб-қувватлаш тизимини такомиллаштириш чора-тадбирлари тўғрисида"ги Фармони ҳамда "Хотин-қизларни қўллаб-қувватлаш, уларнинг жамият ҳаётидаги фаол иштирокини таъминлаш тизимини янада такомиллаштириш чора-тадбирлари тўғрисида " ги Қарори ижроси юзасидан Миллий гвардия Хотин-қизлар жамоатчилик кенгаши аъзолари томонидан ҳудудий бўлинмалардаги бошланғич ташкилотларнинг фаолияти ўрганилиб, уларга яқиндан кўмак берилмоқда. 2021 йил ва жорий йилнинг биринчи чораги давомида амалга оширилган ишлар бўйича бошланғич ташкилотлар аъзоларининг ҳисоботлари тингланди.
Аёл ҳарбий хизматчи ва ходималар томонидан хотин-қизлар Кенгашларига муаммолар юзасидан қилган мурожаатлари, самарали ёрдам кўрсатиш учун қандай чоралар кўрилаётгани, шу билан бир қаторда, ҳарбий хизматчиларининг оила аъзолари ҳамда "аёллар дафтарига" киритилган аёлларнинг эҳтиёжлари ва манфаатлари қандай ҳал этилаётгани таҳлил қилинди.
Тадбир давомида аёл-ҳарбий хизматчи ва ходимлар ўртасида интизом ва қонунийликни ошириш, Низомнинг талабларига риоя қилиш ишларига алоҳида эътибор қаратилди.
Миллий гвардия ҳудудий бўлинмалари раҳбарлари иштирокидаги умумий йиғилишларда ҳарбий хизматчилар ва хотин-қизларни ижтимоий-ҳуқуқий қўллаб-қувватлаш масалалари муҳокама қилинди.
Шунингдек, жамоаларда маънавий-психологик муҳитни яхшилаш, олий таълим олишда хотин-қизларга ҳар томонлама кўмаклашиш, гендер тенглигини таъминлаш сиёсатини давом эттириш, хотин-қизларнинг ижтимоий-сиёсий фаоллигини ошириш, уларга ижтимоий-ҳуқуқий, психологик ёрдам кўрсатиш бўйича тушунчалар берилиб, тизимда хизмат қилаётган аёллардаги муаммоларни ўз вақтида аниқлаш юзасидан вазифалар қўйилди.
Ҳарбий хизматчи ва уларнинг оила аъзолари иштирокида ўтказилган очиқ мулоқотлар мавжуд бўлган муаммоларни жойида ҳал этиш имконини берди. Айрим мурожаатлар бўйича Хотин-қизлар жамоатчилик кенгаши аъзолари ва Миллий гвардия бўлинмалари раҳбарияти олдига муаммоларни ҳал этиш чоралари қўйилиб, уларни ижро этиш муддатлари белгиланди.
Бу каби ўтказилаётган очиқ мулоқотлар Хотин-қизлар жамоатчилик кенгаши аъзоларига ҳудудий бўлинмалардаги бошланғич ташкилотларнинг фаолият самарадорлиги тўғрисида хулоса чиқариш имконини бермоқда.
