Yangi O‘zbekiston bog‘ida bo‘lib o‘tgan Yangi nafas umummilliy harakati doirasida “Talaba yugur” ommaviy yugurish musobaqasi yoshlarni bir maqsad sari birlashtirdi
O‘zbekiston bayrog‘i qabul qilinganligining 33 yilligiga bag‘ishlangan tadbirlar respublikamiz bo‘ylab davom etmoqda.
Bugun "Yangi O‘zbekiston" bog‘i hududi bo‘ylab poytaxtimiz va Toshkent viloyatida joylashgan Kuch tuzilmalari va huquqni muhofaza qiluvchi idoralar oliy taʼlim muassasalari kursantlari, shuningdek, davlat oliy taʼlim muassasasi talabalaridan iborat 1600 mingga yaqin yoshlar ishtirok etishdi.
Xususan, marafonda ishtirok etgan 400 ga yaqin kursant va tinglovchilar orasida Milliy gvardiya Jamoat xavfsizligi universitetining 100 nafar kursantlari ham faol ishtirok etib, 3 km masofani to‘liq bosib o‘tishib, faxrli 3-o‘rinni qo‘lga kiritishdi.
Tadbirda Milliy gvardiya Faxriy qorovuli harbiy xizmatchilari tomonidan Davlat bayrog‘ining olib chiqilishi barchada vatanparvarlik va milliy g‘urur hissini uyg‘otdi.
“Talaba yugur” bu – Oliy taʼlim, fan va innovatsiyalar vazirligining O‘zbekiston Yengil atletika federatsiyasi bilan hamkorligi natijasiga aylangan keng ko‘lamli loyiha hisoblanadi. Talabalar orasida jismoniy faollikni rivojlantirish, sog‘lom turmush tarzini ommalashtirish, shuningdek, yoshlarning uyg‘un va har tomonlama rivojlanishidagi eng muhim tarkibiy qismlar sifatida sport va taʼlimni birlashtirishga xizmat qiladi.
