Jizzax viloyatida o‘g‘irlik sodir qilgan fuqaro Milliy gvardiya xodimlari tomonidan Guliston shahrida qo‘lga olindi
Joriy yilning 5 avgust kuni tungi soat 22.30 larda Guliston shahar istirohat bog‘i hududida patrullik xizmatini olib borayotgan Milliy gvardiya harbiy xizmatchilari tamaki mahsuloti isteʼmol qilayotgan o‘smirni ko‘rib qolishgan.
Profilaktik suhbat o‘tkazish maqsadida xodimlar o‘smir yigitdan o‘zi va ota-onasi to‘g‘risida maʼlumot so‘rashgan. U esa maʼlumot berishni istamagan, shu sabab harbiy xizmatchilar o‘smirni Guliston ichki ishlar bo‘limiga olib borishgan. Bu yerda uning shaxsiga aniqlik kiritilganda u Samarqand viloyatida tug‘ilganligi, Sirdaryo viloyatiga esa ichki ishlar organlaridan yashirinish maqsadida kelganligi maʼlum bo‘lgan. Joriy yilning 4 avgustdan 5 avgustga o‘tar kechasi ushbu yigit zargarlik do‘koniga kirib, u yerdan 30 mln. so‘mga yaqin mablag‘ni o‘g‘irlagan. Tintuv davomida qo‘lga olingan shaxs yonida bo‘lgan sumkadan 25 mln. so‘mga yaqin mablag‘ topilgan. Jizzax shahar ichki ishlar boshqarmasi tomonidan do‘konda sodir etilgan o‘g‘irlik holati bo‘yicha O‘zbekiston Respublikasi Jinoyat kodeksining 169-moddasi 2-qismi bilan jinoiy ish qo‘zg‘atilgan.
Hozirda qo‘lga olingan shaxs tergov harakatlari uchun Jizzax shahar ichki ishlar organlariga topshirilgan.
