Жиззах вилоятида ўғирлик содир қилган фуқаро Миллий гвардия ходимлари томонидан Гулистон шаҳрида қўлга олинди
Жорий йилнинг 5 август куни тунги соат 22.30 ларда Гулистон шаҳар истироҳат боғи ҳудудида патруллик хизматини олиб бораётган Миллий гвардия ҳарбий хизматчилари тамаки маҳсулоти истеъмол қилаётган ўсмирни кўриб қолишган.
Профилактик суҳбат ўтказиш мақсадида ходимлар ўсмир йигитдан ўзи ва ота-онаси тўғрисида маълумот сўрашган. У эса маълумот беришни истамаган, шу сабаб ҳарбий хизматчилар ўсмирни Гулистон ички ишлар бўлимига олиб боришган. Бу ерда унинг шахсига аниқлик киритилганда у Самарқанд вилоятида туғилганлиги, Сирдарё вилоятига эса ички ишлар органларидан яшириниш мақсадида келганлиги маълум бўлган. Жорий йилнинг 4 августдан 5 августга ўтар кечаси ушбу йигит заргарлик дўконига кириб, у ердан 30 млн. сўмга яқин маблағни ўғирлаган. Тинтув давомида қўлга олинган шахс ёнида бўлган сумкадан 25 млн. сўмга яқин маблағ топилган. Жиззах шаҳар ички ишлар бошқармаси томонидан дўконда содир этилган ўғирлик ҳолати бўйича Ўзбекистон Республикаси Жиноят кодексининг 169-моддаси 2-қисми билан жиноий иш қўзғатилган.
Ҳозирда қўлга олинган шахс тергов ҳаракатлари учун Жиззах шаҳар ички ишлар органларига топширилган.
