KADRLAR TAYYORLASH VA MALAKASINI OSHIRISH YO‘LIDAGI ISLOHOTLAR
O‘zbekiston Respublikasi Milliy gvardiyasi Jizzax mintaqaviy o‘quv markazida davra suhbati bo‘lib o‘tdi. Ushbu tadbirda O‘zbekiston Respublikasi Milliy gvardiyasi qo‘mondonining o‘rinbosari – Qo‘riqlash bosh boshqarmasi boshlig‘i polkovnik M.Ganiyev, mutasaddi rahbarlar hamda o‘quv markazi shaxsiy tarkibi ishtirok etdi.
Tadbir avvalida mehmonlar ushbu mintaqaviy o‘quv markazi faoliyatini tubdan isloh qilish, shuningdek, markaz hududi va bino-inshootlarini rekonstruksiya qilish bo‘yicha amalga oshirilayotgan ishlar bilan tanishtirildi.
Davra suhbati davomida so‘z olganlar tomonidan tizimda taʼlim-tarbiya jarayoni, ilm-fanni rivojlantirishga Davlat rahbari tomonidan alohida eʼtibor qaratilayotgani, mintaqaviy o‘quv markazlarining rivojlanishi, ularning shaxsiy tarkibi o‘z ustida ishlab, shaxsiy kamol topishlari hamda tinglovchilarga eng zamonaviy metodlar yordamida mashg‘ulotlar o‘tishlari uchun barcha shart-sharoitlar yaratilayotganligi, Davlat rahbari va Milliy gvardiya qo‘mondonligining Milliy gvardiya tarkibidagi o‘quv markazlaridan umidlari katta ekanligini, turli tuzilmalar, asosan Milliy gvardiya, uning tarkibidagi qo‘riqlash faoliyatiga masʼul bo‘linmalar uchun kadrlar tayyorlash, qayta tayyorlash va malakasini oshirish bilan bir qatorda, sohalarga ilm-fan yangiliklarini olib kirish hamda joriy qilish zarurati haqida maʼruza qildi.
Davra suhbatining ikkinchi qismida Milliy gvardiya Jizzax mintaqaviy o‘quv markazi boshlig‘i podpolkovnik A.S.Ismoilov ushbu o‘quv markazi faoliyatini takomillashtirish va rivojlantirish bo‘yicha oldinda turgan vazifalar, amalga oshirilishi lozim bo‘lgan islohotlar, davlat rahbariyati va Milliy gvardiya qo‘mondonligi tomonidan yaratib berilayotgan imkoniyatlar haqida atroflicha gapirdi. Jumladan, bundan buyon o‘quv markazi yangicha uslubda ishlashga o‘tishi, o‘quv markazi faoliyati zamon bilan hamnafas, eng ilg‘or tajribalar asosida rivojlanishi uchun barcha imkoniyatlar mavjudligi, faqatgina sidqidildan, masʼuliyat va shijoat bilan xizmat qilib ushbu maqsadlarga erishish mumkinligi, bu borada Jamoat xavfsizligi universiteti bilan bir qatorda, mamlakatimizdagi, ayniqsa, Jizzax viloyatida joylashgan oliy taʼlim muassasalari va boshqa tashkilotlar bilan ham qalin hamkorlik olib borilishini taʼkidladi.
Shuningdek, tadbir davomida O‘zbekiston Respublikasi Jamoat xavfsizligi universiteti oliy taʼlim muassasalarida ilmiy-tadqiqot ishlari bilan shug‘ullanish uchun yaratilgan sharoitlar, doktorantura va mustaqil izlanuvchilik shakllarida tadqiqot olib boriluvchi fan tarmoqlari va ixtisosliklari haqida o‘quv markazi shaxsiy tarkibiga batafsil maʼlumot berdilar. So‘ngra, ushbu mintaqaviy o‘quv markazi shaxsiy tarkibi aʼzolarini qiziqtirgan savollarga javob berdilar.
Tadbir so‘nggida oliy taʼlim muassasalari vakillari Jizzax mintaqaviy o‘quv markazi bilan kelgusidagi hamkorlik istiqbollarini muhokama qildilar va tegishli yo‘nalishlarda muntazam ravishda tajriba almashib turish, o‘quv markazini namunali taʼlim muassasasiga aylantirish yo‘lida barcha imkoniyatlarni ishga solishga kelishib oldilar.
