КАДРЛАР ТАЙЁРЛАШ ВА МАЛАКАСИНИ ОШИРИШ ЙЎЛИДАГИ ИСЛОҲОТЛАР
Ўзбекистон Республикаси Миллий гвардияси Жиззах минтақавий ўқув марказида давра суҳбати бўлиб ўтди. Ушбу тадбирда Ўзбекистон Республикаси Миллий гвардияси қўмондонининг ўринбосари – Қўриқлаш бош бошқармаси бошлиғи полковник М.Ганиев, мутасадди раҳбарлар ҳамда ўқув маркази шахсий таркиби иштирок этди.
Тадбир аввалида меҳмонлар ушбу минтақавий ўқув маркази фаолиятини тубдан ислоҳ қилиш, шунингдек, марказ ҳудуди ва бино-иншоотларини реконструкция қилиш бўйича амалга оширилаётган ишлар билан таништирилди.
Давра суҳбати давомида сўз олганлар томонидан тизимда таълим-тарбия жараёни, илм-фанни ривожлантиришга Давлат раҳбари томонидан алоҳида эътибор қаратилаётгани, минтақавий ўқув марказларининг ривожланиши, уларнинг шахсий таркиби ўз устида ишлаб, шахсий камол топишлари ҳамда тингловчиларга энг замонавий методлар ёрдамида машғулотлар ўтишлари учун барча шарт-шароитлар яратилаётганлиги, Давлат раҳбари ва Миллий гвардия қўмондонлигининг Миллий гвардия таркибидаги ўқув марказларидан умидлари катта эканлигини, турли тузилмалар, асосан Миллий гвардия, унинг таркибидаги қўриқлаш фаолиятига масъул бўлинмалар учун кадрлар тайёрлаш, қайта тайёрлаш ва малакасини ошириш билан бир қаторда, соҳаларга илм-фан янгиликларини олиб кириш ҳамда жорий қилиш зарурати ҳақида маъруза қилди.
Давра суҳбатининг иккинчи қисмида Миллий гвардия Жиззах минтақавий ўқув маркази бошлиғи подполковник А.С.Исмоилов ушбу ўқув маркази фаолиятини такомиллаштириш ва ривожлантириш бўйича олдинда турган вазифалар, амалга оширилиши лозим бўлган ислоҳотлар, давлат раҳбарияти ва Миллий гвардия қўмондонлиги томонидан яратиб берилаётган имкониятлар ҳақида атрофлича гапирди. Жумладан, бундан буён ўқув маркази янгича услубда ишлашга ўтиши, ўқув маркази фаолияти замон билан ҳамнафас, энг илғор тажрибалар асосида ривожланиши учун барча имкониятлар мавжудлиги, фақатгина сидқидилдан, масъулият ва шижоат билан хизмат қилиб ушбу мақсадларга эришиш мумкинлиги, бу борада Жамоат хавфсизлиги университети билан бир қаторда, мамлакатимиздаги, айниқса, Жиззах вилоятида жойлашган олий таълим муассасалари ва бошқа ташкилотлар билан ҳам қалин ҳамкорлик олиб борилишини таъкидлади.
Шунингдек, тадбир давомида Ўзбекистон Республикаси Жамоат хавфсизлиги университети олий таълим муассасаларида илмий-тадқиқот ишлари билан шуғулланиш учун яратилган шароитлар, докторантура ва мустақил изланувчилик шаклларида тадқиқот олиб борилувчи фан тармоқлари ва ихтисосликлари ҳақида ўқув маркази шахсий таркибига батафсил маълумот бердилар. Сўнгра, ушбу минтақавий ўқув маркази шахсий таркиби аъзоларини қизиқтирган саволларга жавоб бердилар.
Тадбир сўнггида олий таълим муассасалари вакиллари Жиззах минтақавий ўқув маркази билан келгусидаги ҳамкорлик истиқболларини муҳокама қилдилар ва тегишли йўналишларда мунтазам равишда тажриба алмашиб туриш, ўқув марказини намунали таълим муассасасига айлантириш йўлида барча имкониятларни ишга солишга келишиб олдилар.
