KASBIGA SADOQATLI KINOLOGLAR
It insonning vafodor do‘sti va yordamchisi bo‘lib, uning yonida deyarli minglab yillardan buyon yashab kelmoqda. It azal-azaldan ov qilishda, qo‘y podalarini boqishda, ombor xonalarini qo‘riqlashda, bugungi kunga kelib esa jinoyatchilarni qo‘lga olish hamda giyohvandlik vositalarini topishda, shuningdek boshqa muhim ishlarda ham katta yordam berib kelmoqda.
O‘tgan yillar davomida Milliy gvardiya Buxoro viloyati bo‘yicha boshqarmasining kinolog mutaxassislari o‘ziga biriktirilgan xizmat iti bilan viloyat miqyosida o‘tkazilayotgan ijtimoiy-siyosiy, ommaviy-madaniy tadbirlar, sport musobaqalari hamda vatanparvarlik tadbirlarida faol ishtirok etib, tadbirlar chog‘ida jamoat tartibini hamda fuqarolar xavfsizligini saqlash borasida munosib hissa qo‘shib kelmoqda.
Shuningdek, Buxoro viloyati hududida sodir etilgan jinoyatlarning voqea joylariga huquqni muhofaza qiluvchi organlar vakillari hamkorligida chiqib, xizmat iti imkoniyatlaridan samarali foydalanib kelinmoqda. Buning natijasida esa o‘tgan davr mobaynida o‘g‘rilik va giyohvandlik vositalari bilan bog‘liq jinoyatlar “issiq izida” fosh etildi.
Hozirda Milliy gvardiya Buxoro viloyati bo‘yicha boshqarmasida nemis, Belgiya va Sharqiy Yevropa ovcharkalari, labrador hamda spaniyel zotli itlardan foydalanib kelinmoqda.
