КАСБИГА САДОҚАТЛИ КИНОЛОГЛАР
Ит инсоннинг вафодор дўсти ва ёрдамчиси бўлиб, унинг ёнида деярли минглаб йиллардан буён яшаб келмоқда. Ит азал-азалдан ов қилишда, қўй подаларини боқишда, омбор хоналарини қўриқлашда, бугунги кунга келиб эса жиноятчиларни қўлга олиш ҳамда гиёҳвандлик воситаларини топишда, шунингдек бошқа муҳим ишларда ҳам катта ёрдам бериб келмоқда.
Ўтган йиллар давомида Миллий гвардия Бухоро вилояти бўйича бошқармасининг кинолог мутахассислари ўзига бириктирилган хизмат ити билан вилоят миқёсида ўтказилаётган ижтимоий-сиёсий, оммавий-маданий тадбирлар, спорт мусобақалари ҳамда ватанпарварлик тадбирларида фаол иштирок этиб, тадбирлар чоғида жамоат тартибини ҳамда фуқаролар хавфсизлигини сақлаш борасида муносиб ҳисса қўшиб келмоқда.
Шунингдек, Бухоро вилояти ҳудудида содир этилган жиноятларнинг воқеа жойларига ҳуқуқни муҳофаза қилувчи органлар вакиллари ҳамкорлигида чиқиб, хизмат ити имкониятларидан самарали фойдаланиб келинмоқда. Бунинг натижасида эса ўтган давр мобайнида ўғрилик ва гиёҳвандлик воситалари билан боғлиқ жиноятлар “иссиқ изида” фош этилди.
Ҳозирда Миллий гвардия Бухоро вилояти бўйича бошқармасида немис, Бельгия ва Шарқий Европа овчаркалари, лабрадор ҳамда спаниель зотли итлардан фойдаланиб келинмоқда.
