Kechasi baland ovozda musiqa eshitishni xush ko‘ruvchi fuqarolar maʼmuriy javobgarlikka tortildi
22 iyul shanbadan yakshanbaga o‘tar kechasi Shayxontohur tumanida o‘ziga biriktirilgan hududda patrul xizmatini o‘tayotgan Milliy gvardiya Toshkent shahri bo‘yicha boshqarmasi harbiy xizmatchilari tomonidan mazkur hududda yashovchi fuqarolardan avtoturargohda to‘xtab turgan avtomobildan baland musiqa ovozi eshitilayotgani haqida murojaat kelib tushgan. Mazkur holat yuzasidan tezkor chora-tadbirlar olib borilib, mazkur avtomashina haydovchisi Qashqadaryo viloyatida yashovchi 23 yoshli N.A. ekanligi aniqlangan. Unga nisbatan O‘zbekiston Respublikasi Maʼmuriy javobgarlik to‘g‘risidagi kodeksining 192-moddasi (“Maishiy shovqinga qarshi kurash talablarini buzish”) bilan maʼmuriy chora qo‘llanilib, jarima solindi.
Chilonzor tumanida 23 iyul kuni Milliy gvardiya harbiy xizmatchilari tomonidan yana bir baland musiqa ishqibozi aniqlanib, maʼmuriy javobgarlikka tortildi. O‘n sakkiz yoshli K.N. soat 4:20 da turar-joy binosi kiraverishida musiqani baland ovozda eshitgan. Shuningdek, yigit O‘zbekiston Respublikasi Maʼmuriy javobgarlik to‘g‘risidagi kodeksining 192-moddasi (“Maishiy shovqinga qarshi kurashi talablarini buzish”) bilan jarimaga tortildi.
Nukus shahrida Milliy gvardiya Qoraqalpog‘iston Respublikasi bo‘yicha boshqarmasi harbiy xizmatchilari tomonidan tunda boshqa fuqarolarning xotirjam dam olish huquqini mensimay, akustik karnay yordamida musiqa eshitgan 34 yoshli fuqaro M.A.ga nisbatan maʼmuriy chora ko‘rildi. Shuningdek, ushbu shaxs O‘zbekiston Respublikasi Maʼmuriy javobgarlik to‘g‘risidagi kodeksining 192-moddasi (“Maishiy shovqinga qarshi kurash talablarini buzish”)da nazarda tutilgan huquqbuzarlikni sodir etgani uchun jarimaga tortildi.
Hurmatli respublika aholisi va mehmonlari, shuni eslatib o‘tamizki, fuqarolarning osoyishtaligi va normal dam olishi tungi vaqtda - soat 23-00 dan 6-00 ga qadar, yaʼni baland ovozda qo‘shiq aytish, cholg‘u asboblari chalish, signal berish, baland ovozda musiqa ijro etish va shoshilinch zaruratdan kelib chiqmagan holda taʼmirlash ishlarini bajarganlik uchun jarima nazarda tutilgan.
