KELAJAGING O‘Z QO‘LINGDA
Yoshlar va voyaga yetmaganlar o‘rtasida huquqbuzarlik va jinoyatchilikni oldini olish, shuningdek ularni keskin kamaytirish maqsadida profilaktik hisobda turgan yoshlar orasida targ‘ibot-tashviqot ishlarini olib borish, ularga ijtimoiy psixologik ko‘mak berish maqsadida bir qator chora-tadbirlar amalga oshirilmoqda.
Xususan, joriy yilning 11 may kuni Sirdaryo viloyati bo‘yicha Milliy gvardiya boshqarmasida profilaktik hisobda turuvchi yoshlar ishtirokida “Kelajaging o‘z qo‘lingda” shiori ostida tadbir tashkil etildi. Unda viloyat hokimligi, Yoshlar ishlari agentligi viloyat boshqarmasi va Yoshlar ittifoqi viloyat Kengashi, Ichki ishlar boshqarmasi hamda Guliston davlat universiteti mutasaddi vakillari qatnashdi.
Tadbir avvalida, o‘quvchi yoshlar harbiy xizmatchilar uchun yaratilgan shart-sharoitlar bilan yaqindan tanishdi. Shundan so‘ng, ishtirokchilarga qurol-aslaha va harbiy texnikalar ko‘rgazmasi namoyish etildi.
Shuningdek, tadbirda Guliston davlat universiteti malakali psixologlari tomonidan “Zanjir”, “O‘zligingni namoyon et” hamda “Tilak” kabi psixologik treninglar o‘tkazildi.
Bu kabi treninglar, yoshlarni avvalo, o‘z oldiga to‘g‘ri maqsad qo‘ya olishi va shu maqsad sari ildam qadam bosish yo‘lidagi harakatlarini to‘g‘ri boshqarishda xizmat qiladi.
