КЕЛАЖАГИНГ ЎЗ ҚЎЛИНГДА
Ёшлар ва вояга етмаганлар ўртасида ҳуқуқбузарлик ва жиноятчиликни олдини олиш, шунингдек уларни кескин камайтириш мақсадида профилактик ҳисобда турган ёшлар орасида тарғибот-ташвиқот ишларини олиб бориш, уларга ижтимоий психологик кўмак бериш мақсадида бир қатор чора-тадбирлар амалга оширилмоқда.
Хусусан, жорий йилнинг 11 май куни Сирдарё вилояти бўйича Миллий гвардия бошқармасида профилактик ҳисобда турувчи ёшлар иштирокида “Келажагинг ўз қўлингда” шиори остида тадбир ташкил этилди. Унда вилоят ҳокимлиги, Ёшлар ишлари агентлиги вилоят бошқармаси ва Ёшлар иттифоқи вилоят Кенгаши, Ички ишлар бошқармаси ҳамда Гулистон давлат университети мутасадди вакиллари қатнашди.
Тадбир аввалида, ўқувчи ёшлар ҳарбий хизматчилар учун яратилган шарт-шароитлар билан яқиндан танишди. Шундан сўнг, иштирокчиларга қурол-аслаҳа ва ҳарбий техникалар кўргазмаси намойиш этилди.
Шунингдек, тадбирда Гулистон давлат университети малакали психологлари томонидан “Занжир”, “Ўзлигингни намоён эт” ҳамда “Тилак” каби психологик тренинглар ўтказилди.
Бу каби тренинглар, ёшларни аввало, ўз олдига тўғри мақсад қўя олиши ва шу мақсад сари илдам қадам босиш йўлидаги ҳаракатларини тўғри бошқаришда хизмат қилади.
