Kengaytirilgan yig‘ilish tahliliy va tanqidiy ruhda bo‘lib o‘tdi
O‘zbekiston Respublikasi Milliy gvardiyasi markaziy devonida tizimda harbiy intizom holati, shaxsiy tarkib o‘rtasida huquqbuzarliklarni oldini olish hamda yo‘l qo‘yilgan kamchiliklarni o‘z vaqtida bartaraf etish chora-tadbirlariga bag‘ishlangan video-selektor tarzidagi kengaytirilgan yig‘ilish bo‘lib o‘tdi.
Qo‘mondon o‘rinbosari polkovnik S.Mamayusupov raisligida o‘tkazilgan mazkur yig‘ilishda O‘zbekiston Respublikasi Harbiy sudi raisi o‘rinbosari A.Jonqobilov, Harbiy prokurorning birinchi o‘rinbosari adliya polkovnigi O.Xolboyev hamda Davlat xavfsizlik xizmati masʼullari, Milliy gvardiya tarkibiy va hududiy bo‘linma mutasaddi rahbarlari hamda soha vakillari shuningdek, viloyatlardagi harbiy prokurorlar ishtirok etishdi.
Dastlab qo‘mondon o‘rinbosarining 2022 yil davomida shaxsiy tarkib o‘rtasidagi harbiy intizom holati, olib borilgan tarbiyaviy va mafkuraviy ishlar, yo‘lga qo‘yilgan kamchiliklar hamda erishilgan yutuqlar bo‘yicha axboroti tinglandi.
Shu bilan birga, yig‘ilishda so‘zga chiqqan huquqni muhofaza qiluvchi organlar mutasaddilari tomonidan ham shaxsiy tarkib bilan bog‘liq nojo‘ya xatti-harakatlarga to‘xtalib, harbiy xizmatchi va xodimlarni kasb madaniyatiga rioya qilishlari, korrupsiya va taʼmagirlik illatlaridan saqlanishlari, shaxsiy va xizmat avtomabillarini boshqarishda yo‘l harakati qoidalariga qatʼiy rioya etishlari yuzasidan ko‘rsatma va tavsiyalar berildi.
Shu qatorda Milliy gvardiyaning qisqa vaqt davomida halqimiz ishonchiga kirib yuklatilgan vazifalarni yuqori darajada bajarib kelayotganliklari ham alohida taʼkidlandi.
Yig‘ilish so‘ngida barcha hududiy boshqarma va muassasalarda harbiy intizom holatlarini chuqur va tanqidiy tahlil qilib, joylarda huquqni muhofaza qiluvchi organlar bilan hamkorlikda hisobot yig‘ilishlarini o‘tkazish, harbiy sudlar bilan sayyor sudlar tashkil etish, huquqbuzarlik va harbiy intizomni buzishga moyilligi bo‘lganlarga intizomiy taʼsir sifatida “Prokuror ogohlantirishi”ni qo‘llash tartibi yo‘lga qo‘yilishi, huquqbuzarliklarni oldini olishga qaratilgan mavzuga oid profilaktik filmlar bazasini yaratish hamda tizimga munosib nomzodlarni o‘rganish jarayonini sifatli tashkil etish yuzasidan vazifalar belgilab olindi.
