Кенгайтирилган йиғилиш таҳлилий ва танқидий руҳда бўлиб ўтди
Ўзбекистон Республикаси Миллий гвардияси марказий девонида тизимда ҳарбий интизом ҳолати, шахсий таркиб ўртасида ҳуқуқбузарликларни олдини олиш ҳамда йўл қўйилган камчиликларни ўз вақтида бартараф этиш чора-тадбирларига бағишланган видео-селектор тарзидаги кенгайтирилган йиғилиш бўлиб ўтди.
Қўмондон ўринбосари полковник С.Мамаюсупов раислигида ўтказилган мазкур йиғилишда Ўзбекистон Республикаси Ҳарбий суди раиси ўринбосари А.Жонқобилов, Ҳарбий прокурорнинг биринчи ўринбосари адлия полковниги О.Холбоев ҳамда Давлат хавфсизлик хизмати масъуллари, Миллий гвардия таркибий ва ҳудудий бўлинма мутасадди раҳбарлари ҳамда соҳа вакиллари шунингдек, вилоятлардаги ҳарбий прокурорлар иштирок этишди.
Дастлаб қўмондон ўринбосарининг 2022 йил давомида шахсий таркиб ўртасидаги ҳарбий интизом ҳолати, олиб борилган тарбиявий ва мафкуравий ишлар, йўлга қўйилган камчиликлар ҳамда эришилган ютуқлар бўйича ахбороти тингланди.
Шу билан бирга, йиғилишда сўзга чиққан ҳуқуқни муҳофаза қилувчи органлар мутасаддилари томонидан ҳам шахсий таркиб билан боғлиқ ножўя хатти-ҳаракатларга тўхталиб, ҳарбий хизматчи ва ходимларни касб маданиятига риоя қилишлари, коррупция ва таъмагирлик иллатларидан сақланишлари, шахсий ва хизмат автомабилларини бошқаришда йўл ҳаракати қоидаларига қатъий риоя этишлари юзасидан кўрсатма ва тавсиялар берилди.
Шу қаторда Миллий гвардиянинг қисқа вақт давомида ҳалқимиз ишончига кириб юклатилган вазифаларни юқори даражада бажариб келаётганликлари ҳам алоҳида таъкидланди.
Йиғилиш сўнгида барча ҳудудий бошқарма ва муассасаларда ҳарбий интизом ҳолатларини чуқур ва танқидий таҳлил қилиб, жойларда ҳуқуқни муҳофаза қилувчи органлар билан ҳамкорликда ҳисобот йиғилишларини ўтказиш, ҳарбий судлар билан сайёр судлар ташкил этиш, ҳуқуқбузарлик ва ҳарбий интизомни бузишга мойиллиги бўлганларга интизомий таъсир сифатида “Прокурор огоҳлантириши”ни қўллаш тартиби йўлга қўйилиши, ҳуқуқбузарликларни олдини олишга қаратилган мавзуга оид профилактик фильмлар базасини яратиш ҳамда тизимга муносиб номзодларни ўрганиш жараёнини сифатли ташкил этиш юзасидан вазифалар белгилаб олинди.
