Kinolog-mutaxassislar oʻrtasida xizmat koʻpkurashi boʻyicha musobaqa oʻtkazildi
Kuni kecha Milliy gvardiya Surxondaryo viloyati "Qoʻriqlash" boshqarmasi tizimidagi kinolog mutaxassislar oʻrtasida viloyat birinchiligi uchun xizmat koʻpkurashi boʻyicha musobaqa boʻlib oʻtdi.
Termiz tumanida tashkil etilgan musobaqa viloyat "Qoʻriqlash" boshqarmasi tizimidagi kinolog-mutaxassislarning bilim va koʻnikmalarini oshirish, ularning kasbiy mahoratini baholash, respublika va xalqaro musobaqalarga tayyorlashga hamda amaliy tajriba orttirishga xizmat qildi. Unda kinologlar oʻzlariga biriktirilgan xizmat itlari bilan ishtirok etib, jismoniy tayyorgarligi va kasbiy mahoratlarini namoyon etishdi.
Bahslarda xizmat itlarining buyruqlarga boʻysunishi, toʻsiqlardan oʻtishi hamda xizmat biatloni kabi shartlarda kinologlar bilan birga xizmat itlarining ham oʻziga yuklatilgan vazifani qay darajada uddalashi sinovdan oʻtkazildi.
Musobaqaning yakuniy natijalariga koʻra barcha shartlarni aʼlo darajada bajargan gʻoliblar nomi aniqlanib, faxrli oʻrinlarni egallagan kinologlarga "Qoʻriqlash" boshqarmasi rahbariyati tomonidan diplom va esdalik sovgʻalari tantanali ravishda topshirildi.
Uyushtirilgan mazkur bellashuv barcha ishtirokchilar uchun oʻzaro bilim, malaka va tajriba almashish imkonini berdi.
