Кинолог-мутахассислар ўртасида хизмат кўпкураши бўйича мусобақа ўтказилди
Куни кеча Миллий гвардия Сурхондарё вилояти «Қўриқлаш» бошқармаси тизимидаги кинолог мутахассислар ўртасида вилоят биринчилиги учун хизмат кўпкураши бўйича мусобақа бўлиб ўтди.
Термиз туманида ташкил этилган мусобақа вилоят «Қўриқлаш» бошқармаси тизимидаги кинолог-мутахассисларнинг билим ва кўникмаларини ошириш, уларнинг касбий маҳоратини баҳолаш, республика ва халқаро мусобақаларга тайёрлашга ҳамда амалий тажриба орттиришга хизмат қилди. Унда кинологлар ўзларига бириктирилган хизмат итлари билан иштирок этиб, жисмоний тайёргарлиги ва касбий маҳоратларини намоён этишди.
Баҳсларда хизмат итларининг буйруқларга бўйсуниши, тўсиқлардан ўтиши ҳамда хизмат биатлони каби шартларда кинологлар билан бирга хизмат итларининг ҳам ўзига юклатилган вазифани қай даражада уддалаши синовдан ўтказилди.
Мусобақанинг якуний натижаларига кўра барча шартларни аъло даражада бажарган ғолиблар номи аниқланиб, фахрли ўринларни эгаллаган кинологларга «Қўриқлаш» бошқармаси раҳбарияти томонидан диплом ва эсдалик совғалари тантанали равишда топширилди.
Уюштирилган мазкур беллашув барча иштирокчилар учун ўзаро билим, малака ва тажриба алмашиш имконини берди.
