"Vatanparvar yosh gvardiyachilar" klubi yoshlarga mahorat maktabi vazifasini o‘tamoqda
O‘zbekiston Respublikasining 2016 yil 14 sentyabrdagi "Yoshlarga oid davlat siyosati to‘g‘risida"gi Qonuni hamda O‘zbekiston Respublikasida 2020 yilda yoshlarga oid davlat siyosatini yangi bosqichga olib chiqishga qaratilgan chora-tadbirlar dasturi ijrosini taʼminlash maqsadida O‘zbekiston Respublikasi Milliy gvardiyasi, Xalq taʼlimi vazirligi, Yoshlar ishlari agentligi va O‘zbekiston yoshlar ittifoqi tomonidan qabul qilingan qo‘shma qarorga muvofiq, hududlarda Milliy gvardiya tizimida xizmat o‘tayotgan harbiy xizmatchi va xodimlarning farzandlari, shuningdek sohaga qiziquvchan mahalla yoshlarining bo‘sh vaqtini mazmunli o‘tkazishlarini taʼminlash, harbiy vatanparvarlik va maʼnaviy-axloqiy, milliy va umuminsoniy qadriyatlarga hurmat ruhida tarbiyalash hamda ularning intellektual va ijodiy salohiyatini ro‘yobga chiqarish maqsadida "Vatanparvar yosh gvardiyachilar" klubi faoliyati yo‘lga qo‘yilgan.
Ayni kunlarda esa, yoshlarning darsdan bo‘sh vaqtlaridan kelib chiqqan holda, haftaning har uch kunida Milliy gvardiya Buxoro viloyati bo‘yicha boshqarmasida "Vatanparvar yosh gvardiyachilar" klubi aʼzolari bilan o‘quv va amaliy mashg‘ulotlar olib borilib, ular bilan jismoniy sog‘lomlashtirish hamda harbiy-vatanparvarlik tadbirlari amalga oshirilmoqda.
