Bugun Milliy gvardiya qo‘mondoni genaral-mayor R.Djurayev poytaxtimizning Uchtepa tumani Nayman mahallasida joylashgan turar joy majmuasiga tashrif buyurib, majmuada istiqomat qiluvchi Oilaviy bolalar uylari tarbiyalanuvchilarini bayram bilan samimiy qutladi.

Shuningdek, qo‘mondon tadbir mehmonlari ishtirokida Azizovlar oilasining uch nafar farzandining xatna to‘ylari o‘tkazilayotganligi munosabati bilan bolajonlarga sovg‘alar ulashdi.

Shundan so‘ng, barcha mutasaddilar Milliy gvardiya qoshidagi Bolalar psixologiyasi markazi hamda homiylar tomonidan Chirchiq shahridagi 14-sonli va Toshkent shahridagi 22-sonli Mehribonlik uyi tarbiyalanuvchilari uchun tashkil etilgan “Sumalak-party”da ishtirok etdi.

Bayram yosh polvonlarning turli chiqishlari hamda sirk tomoshalari bilan boshlanib, Milliy gvardiya Maʼnaviyat va maʼrifat markazi Ashula va raqs ansambli sanʼatkorlari hamda Alohida namunali-ko‘rgazmali harbiy orkestr tomonidan ijro etilgan kuy-qo‘shiqlar bilan davom etdi.

Ayniqsa, Bolalar psixologiyasi markazi mutaxassislari tomonidan eng qiziqarli va ayni paytda foydali, rivojlantiruvchi, bo‘sh vaqtini mazmunli o‘tkazish imkoniyatini beruvchi burchaklarning tashkil etilishi bolalarda katta qiziqish uyg‘otdi .

Shu bilan birga, Maʼnaviyat va maʼrifat markazi qoshida faoliyat yuritayotgan sport seksiyalari, raqs jamoasining chiqishlari, kamondan otish va ot minish bo‘yicha mahorat saboqlari hamda bayram dasturxoni barchaning eʼtirofiga sazovor bo‘ldi.

Bu kabi bayramona tadbirlar Milliy gvardiyaning hududiy bo‘linmalarida davom etmoqda.