O‘zbekiston Kubogi g‘oliblari aniqlandi
Xabar berganimizdek, joriy yilning 18-20 may kunlari Toshkent shahridagi “Botanika bog‘i”da ochiq osmon ostida sportning qo‘l jangi turi bo‘yicha yoshlar va o‘smirlar o‘rtasida “O‘zbekiston Kubogi” musobaqasiga start berilgan edi.
Respublikamizning barcha hududlaridan 600 ga yaqin o‘g‘il-qizlarni o‘zida jamlagan mazkur bellashuvda 34 ta vazn toifasi bo‘yicha jami 14 ta jamoa g‘oliblik uchun qizg‘in va murosasiz janglarda o‘z imkoniyatlarini sinovdan o‘tkazishdi.
Bugun, musobaqa kubogini qo‘lga kiritish uchun final bosqichiga yo‘l olgan sportchilar bor mahoratini ishga solib, muvaffaqiyat sari kurashdi. G‘oliblik bo‘lsa albatta eng kuchlilarga nasib etdi.
Bellashuv so‘ngida, O‘zbekiston huquqni muhofaza qilish organlari Qo‘l jangi federatsiyasi raisi R.Djurayev hamda mutasaddi tashkilot vakillari tomonidan sovrindorlarga musobaqa medali, diplomi va esdalik sovg‘alari tantanali ravishda topshirildi.
Shuningdek, umumjamoa hisobida 3-o‘rinni egallagan Jizzax viloyati, 2-o‘ringa munosib topilgan Namangan viloyati va faxrli 1-o‘rinni qo‘lga kiritgan Andijon viloyati jamoalarining murabbiylariga kuboklar tantanali ravishda topshirildi.
Bu kabi musobaqalar orqali yoshlarimiz o‘zlariga yuksak tajriba va mahorat orttirishlari bilan birga, mazkur sport turining joylarda yana-da ommalashishiga xizmat qilishi shubhasizdir.
