Ўзбекистон Кубоги ғолиблари аниқланди
Хабар берганимиздек, жорий йилнинг 18-20 май кунлари Тошкент шаҳридаги “Ботаника боғи”да очиқ осмон остида спортнинг қўл жанги тури бўйича ёшлар ва ўсмирлар ўртасида “Ўзбекистон Кубоги” мусобақасига старт берилган эди.
Республикамизнинг барча ҳудудларидан 600 га яқин ўғил-қизларни ўзида жамлаган мазкур беллашувда 34 та вазн тоифаси бўйича жами 14 та жамоа ғолиблик учун қизғин ва муросасиз жангларда ўз имкониятларини синовдан ўтказишди.
Бугун, мусобақа кубогини қўлга киритиш учун финал босқичига йўл олган спортчилар бор маҳоратини ишга солиб, муваффақият сари курашди. Ғолиблик бўлса албатта энг кучлиларга насиб этди.
Беллашув сўнгида, Ўзбекистон ҳуқуқни муҳофаза қилиш органлари Қўл жанги федерацияси раиси Р.Джураев ҳамда мутасадди ташкилот вакиллари томонидан совриндорларга мусобақа медали, дипломи ва эсдалик совғалари тантанали равишда топширилди.
Шунингдек, умумжамоа ҳисобида 3-ўринни эгаллаган Жиззах вилояти, 2-ўринга муносиб топилган Наманган вилояти ва фахрли 1-ўринни қўлга киритган Андижон вилояти жамоаларининг мураббийларига кубоклар тантанали равишда топширилди.
Бу каби мусобақалар орқали ёшларимиз ўзларига юксак тажриба ва маҳорат орттиришлари билан бирга, мазкур спорт турининг жойларда янада оммалашишига хизмат қилиши шубҳасиздир.
