Milliy gvardiya Toshkent shahar bo‘yicha boshqarmasiga qarashli harbiy qismlarda muddatli harbiy xizmatni o‘tayotgan harbiy xizmatchilarga davlat oliy taʼlim muassasalariga o‘qishga kirish imtiyozini beruvchi tavsiyanomalar uchun sinov imtihonlari o‘tkazilmoqda
Test sinovlari O‘zbekiston Respublikasi Vazirlar Mahkamasi huzuridagi Davlat test markazi tomonidan muddatli harbiy xizmatchilarning jangovar va maʼnaviy-maʼrifiy tayyorgarlik dasturlarining o‘zlashtirganligini yakuniy baholash, shuningdek, ularning bilim darajasini tekshirish maqsadida o‘tkaziladi va test sinovlariga barcha muddatli harbiy xizmatchilar kiritiladi.
Tavsiyanomalar O‘zbekiston Respublikasi Qurolli Kuchlari safida muddatli harbiy xizmatni o‘tab bo‘lgan, jangovar va maʼnaviy-maʼrifiy tayyorgarlik bo‘yicha yuksak natijalarga erishgan, zaruriy bilim saviyasiga ega, namunali harbiy intizomini namoyon etgan eng munosib harbiy xizmatchilarga beriladi.
Ushbu tavsiyanomaga ega bo‘lgan fuqarolar respublikaning oliy harbiy taʼlim muassasalaridagi tegishli taʼlim yo‘nalishlariga o‘qishga kirishda test sinovlari natijalariga ko‘ra o‘zlari to‘plagan ballarining 50 foizi miqdorida qo‘shimcha ball shaklidagi imtiyozni qo‘lga kiritadi.
Shuningdek, respublikaning oliy taʼlim muassasalari (oliy harbiy taʼlim muassasalari bundan mustasno) bakalavriatiga o‘qishga kirish uchun oliy taʼlim muassasalariga qabul parametrlaridan tashqari ajratiladigan alohida qabul ko‘rsatkichlari doirasida tanlovda ishtirok etish huquqiga ega bo‘ladi hamda tavsiyanomalar, ular berilgan sanadan boshlab uch yil mobaynida amal qiladi.
Ishonamizki, tavsiyanomalarni qo‘lga kiritgan zukko va bilimli mard o‘g‘lonlar kelajakda yurtimizga sadoqat bilan xizmat qiladigan yoshlar bo‘lib yetishadi!
