Миллий гвардия Тошкент шаҳар бўйича бошқармасига қарашли ҳарбий қисмларда муддатли ҳарбий хизматни ўтаётган ҳарбий хизматчиларга давлат олий таълим муассасаларига ўқишга кириш имтиёзини берувчи тавсияномалар учун синов имтиҳонлари ўтказилмоқда
Тест синовлари Ўзбекистон Республикаси Вазирлар Маҳкамаси ҳузуридаги Давлат тест маркази томонидан муддатли ҳарбий хизматчиларнинг жанговар ва маънавий-маърифий тайёргарлик дастурларининг ўзлаштирганлигини якуний баҳолаш, шунингдек, уларнинг билим даражасини текшириш мақсадида ўтказилади ва тест синовларига барча муддатли ҳарбий хизматчилар киритилади.
Тавсияномалар Ўзбекистон Республикаси Қуролли Кучлари сафида муддатли ҳарбий хизматни ўтаб бўлган, жанговар ва маънавий-маърифий тайёргарлик бўйича юксак натижаларга эришган, зарурий билим савиясига эга, намунали ҳарбий интизомини намоён этган энг муносиб ҳарбий хизматчиларга берилади.
Ушбу тавсияномага эга бўлган фуқаролар республиканинг олий ҳарбий таълим муассасаларидаги тегишли таълим йўналишларига ўқишга киришда тест синовлари натижаларига кўра ўзлари тўплаган балларининг 50 фоизи миқдорида қўшимча балл шаклидаги имтиёзни қўлга киритади.
Шунингдек, республиканинг олий таълим муассасалари (олий ҳарбий таълим муассасалари бундан мустасно) бакалавриатига ўқишга кириш учун олий таълим муассасаларига қабул параметрларидан ташқари ажратиладиган алоҳида қабул кўрсаткичлари доирасида танловда иштирок этиш ҳуқуқига эга бўлади ҳамда тавсияномалар, улар берилган санадан бошлаб уч йил мобайнида амал қилади.
Ишонамизки, тавсияномаларни қўлга киритган зукко ва билимли мард ўғлонлар келажакда юртимизга садоқат билан хизмат қиладиган ёшлар бўлиб етишади!
