Yangiliklar

Milliy gvardiya qo‘mondoni general-mayor R.Djurayev raisligida bo‘lib o‘tgan ushbu forumda, yurtimiz tinchligi va osoyishtaligini taʼminlashda serjantlar tarkibi, tizimning tayanchi hamda suyanchi ekanligi taʼkidlandi.

Milliy gvardiya tizimida xizmat qilib kelayotgan serjantlarning kasbiy mahorati hamda bilim-ko‘nikmalarini oshirish maqsadida har yili "Serjantlar forumi" o‘tkazilishi anʼanaga aylangan.

Mazkur forum Milliy gvardiya qo‘mondoni raisligida videoselektor tarzida o‘tkazilib, unda sohaga oid mutasaddi rahbarlar, tizim faxriylari va serjantlar tarkibi ishtirok etishdi.

Milliy gvardiya qo‘mondoni o‘zining kirish so‘zida, Qurolli Kuchlar Oliy Bosh Qo‘mondoni Shavkat Mirziyoyevning so‘ngi yillarda harbiy xizmatchilarga, xususan, serjantlarga bo‘lgan yuqori darajadagi eʼtiborini taʼkidlab, Yangi O‘zbekistonni barpo etish yo‘lida erishayotgan barcha yutuq va marralarimizda, kuch tizilmalarida o‘z vazifasini sidqidildan ado etayotgan serjantlarimizning munosib hissasi borligini eʼtirof etdi.

Shuningdek, Milliy gvardiya tizimida serjantlar tarkibini tayyorgarligiga alohida eʼtibor qaratilayotganligi va har qanday murakkab vaziyatlarda jismoniy hamda ruhiy sinovlarga bardosh bera oladigan, nostandart holatlarda mustaqil qaror qabul qilib, yuklatilgan vazifalarni aʼlo darajada bajarishga qodir bo‘lgan kichik komandirlarni shakllantirish uchun barcha sharoitlar mavjudligi aytib o‘tildi.

Shu bilan bir qatorda, ayrim bo‘linmalarda Kengashlar o‘zining faoliyatini to‘g‘ri tashkillashtira olmayotganligi bois, uchrayotgan bir qator salbiy holatlar yodga olinib, tanqidiy tahlil qilindi. Kelgusida barcha kichik komandirlar bundan o‘zlariga tegishli xulosa chiqarib olishlari borasida, qo‘mondonning bugungi fikr mulohazalari va eʼtirozlarini o‘zlarining yelkadosh safdoshlari tomonidan bildirilayotganligi kabi qabul qilishlari taʼkidlandi. Bu esa barcha forum ishtirokchilarini birdek sergak torttirdi desak mubolag‘a bo‘lmaydi.

Qurolli Kuchlar tizimini modernizatsiya qilish, Milliy armiyamizning professional tayyorgarligini yana-da mustahkamlash bo‘yicha belgilab berilgan bir qator chora-tadbir va aniq mexanizmlar asosida olib borilayotgan tizimli islohotlar aynan tizimdagi serjant va oddiy askarlarning har tomonlama yetuk oliy maʼlumotli ofitser kadr sifatida shakllantirishga qaratilayotganligiga alohida to‘xtalib o‘tildi.

Ayniqsa, tizimda ayollarni rolini oshirish, ularning huquq va manfaatlarini himoya qilish, ishga qabul qilish masalalarida ham xotin-qizlarning ko‘rsatkichini oshirish dolzarb masala ekanligi qayd etildi.

Shundan so‘ng, Forum ochiq muloqot tarzida davom ettirildi. Unda Toshkent shahri, Qoraqalpog‘iston Respublikasi, Samarqand, Andijon va boshqa hududiy bo‘linmalardan so‘zga chiqqan serjantlar tomonidan, bugungi kunda harbiy xizmatchi va xodimlarga hamda ularning oila aʼzolariga yaratilayotgan shart-sharoitlar alohida eʼtirof etilib, barcha berilayotgan imkoniyatlar mamnuniyat bilan tilga olindi. Kichik komandirlar nomidan so‘zga chiqqan ayrim serjantlar esa, bugun ular bilan shaxsan qo‘mondonning o‘zi uchrashib ochiq muloqotda bo‘lganidan xursand ekanliklarini va bundan katta motivatsiya olganliklarini bildirishdi.

Shu bilan bir qatorda, o‘z mavzulari bilan maʼruza qilgan serjantlar tomonidan ham hozirgi zamonaviy jang sharoitida Milliy gvardiya serjantlarining jangovar ruhini oshirish borasida, shuningdek, jamoat tartibini saqlash, inson huquq va erkinliklarini taʼminlashda serjantlarning bugungi faoliyati to‘g‘risida so‘z yuritdilar.

Harbiy xizmatdagi faoliyatini har tomonlama rag‘batlantirish, zamonaviy bilim va ko‘nikmalar bilan tajribalarini oshirish hamda ijtimoiy qo‘llab-quvvatlashni o‘z ichiga olgan tadbir yakunida bir qator kichik komandirlar Milliy gvardiya qo‘mondonligi tomonidan munosib rag‘batlantirildi.

Tadbir so‘nggida Milliy gvardiya Maʼnaviyat va maʼrifat markazi Ashula va raqs ansambli xonandalarining kuy va qo‘shiqlari barchaga yuqori kayfiyat ulashdi.