Videoselektor tarzida tashkil etilgan mazkur yig‘ilish, Milliy gvardiya qo‘mondoni general-mayor R.Djurayev hamda Maktabgacha va maktab taʼlimi vaziri X.Umarova boshchiligida o‘tkazilib, unda Respublika bo‘ylab sohaga oid barcha mutasaddi rahbarlar ishtirok etishdi.

Milliy gvardiya qo‘mondoni mazkur yig‘ilishni Qoraqalpog‘iston Respublikasidan olib borib, kirish so‘zida, Davlatimiz rahbarining PQ–1-son Qarori ijrosini taʼminlash borasidagi viloyatlarda olib borilayotgan manzilli o‘rganishlar davomida o‘quvchilar bilan bog‘liq masalalar yuzasidan tegishli chora-tadbirlar ko‘rilayotganligini taʼkidlab o‘tdi.

Shuningdek, Davlatimiz rahbari tomonidan imzolangan PQ-55-son Qarori va unda belgilab berilgan vazifalarning amaliy ijrosi yuzasidan so‘z yuritib, joriy qilingan “Oila-mahalla-maktab” tizimi asosida hamkorlikda yo‘lga qo‘yilgan ishlar natijasida maktablarda o‘quvchilar davomati sezilarli darajada ijobiy tomonga o‘zgarganiga urg‘u berildi.

Qaror ijrosi yuzasidan, maktablarda o‘quvchilarni vatanparvarlik ruhida tarbiyalash orqali ularda “huquqbuzarlikka qarshi immunitet” yaratish borasidagi hamkorlikdagi amalga oshirib kelinayotgan chora-tadbirlarga alohida eʼtibor qaratildi.

Shuningdek, o‘quvchilar tomonidan 2024 yil mobaynida sodir etilgan huquqbuzarliklar hamda davomat bilan bog‘liq masalalar tanqidiy tahlil qilinib, viloyatlar kesimida bir qator misollar keltirib o‘tildi. 

Bu borada, inspektor-psixologlar hamda mahalla yettili tomonidan yangicha ish uslublarini tatbiq qilgan holda hamkorlikdagi ishlarni kuchaytirish yuzasidan tegishliligi bo‘yicha topshiriqlar berildi.