Mazkur yo‘nalishdagi manzilli ishlar joriy yilning 21 fevral kuni Milliy gvardiya qo‘mondoni R.Djurayev, viloyat hokimi A.Maxmudaliyev hamda sohaga oid mutasaddi rahbarlar bilan birgalikda Sardoba tumanidagi 16 va 13-sonli maktablarda, shuningdek Guliston shahridagi 8 va 16-sonli maktablarda olib borildi.

Dastlab Sardoba tumanidagi 16-sonli maktab faoliyati bilan tanishilib,  unda barcha sektor rahbarlari, mahalla yettiligi, tumanning sohaga oid mutasaddilari, maktab maʼmuriyati, o‘qituvchilari va psixolog mutaxassislari, shuningdek Milliy gvardiyadan biriktirilgan masʼul xodimlar ishtirok etishdi.  Ushbu maktabda shu kuni 2 nafar dars qoldirgan o‘quvchilar misolida “maktab-ota-ona-mahalla” zanjiri qay darajada yo‘lga qo‘yilganligi ko‘rib chiqilib, mahalla raislarining harakati tanqidiy baholandi.

Shuningdek, maktab direktorining faolligi va shijoati tufayli  ushbu muassasada yaratilgan shart-sharoyitlar, o‘quvchilarning taʼlim-tarbiya olishiga bo‘lgan ishtiyoqiga ijobiy taʼsir ko‘rsatgani yuqori baholanib,   Milliy gvardiya qo‘mondoni tomonidan direktor Z.Nishonov munosib rag‘batlantirildi.

Ushbu tumanda joylashgan 13-maktab  faoliyatiga esa viloyat hokimi tomonidan qattiq eʼtiroz bildirilib, o‘quvchilarning taʼlim-tarbiyasi va davomati bilan bog‘liq mavjud muammolar muassasa maʼmuriyati va ayrim o‘qituvchilarning masʼuliyatsizligi oqibatida yuzaga kelganligi taʼkidlandi.  Shu sabab sohaga oid mutasaddi rahbarlar hamda masʼul hodimlarga, surunkali dars qoldiradigan har bir o‘quvchi va ularning ota-onalari bilan individual ishlar olib borilishi yuzasidan topshiriqlar yuklatildi.

Yuqorida taʼkidlaganimizdek, Guliston shahrida joylashgan 8 va 16-sonli maktablarda taʼlim-tarbiya va davomati  bo‘yicha mavjud muammolar va ularning yechimi yuzasidan maktab o‘qtiuvchilari, inspektor-psixologlar va mahalla yettiligi o‘rtasidagi hamkorlik masalalari Milliy gvardiya qo‘mondoni hamda viloyat hokimi boshchiligida muhokama qilindi.

Uchrashuv mobaynida 8-maktab o‘quvchilarining davomati va o‘tgan yil davomida voyaga yetmaganlar o‘rtasida qayd etilgan huquqbuzarlik holatlari bilan bog‘liq muammolar tahlil qilinib,  maktab maʼmuriyati va psixolog mutaxassislarning faoliyatiga tanqidiy baho berildi. 

Ushbu maktab o‘quvchilari o‘rtasida kuzatilgan huquqbuzarliklar qayta yod olinib, Milliy gvardiya qo‘mondoni tomonidan ayrim o‘quvchilar xodimlarga nomma-nom biriktirildi, shuningdek maktablarda xavfsiz muhitni yaratishga qaratilgan ishlar doirasida qo‘riqlovni  yangicha tizimda takomillashtirish borasida amalga oshirilayotgan ishlarga ham alohida urg‘u berilib, masʼullarga tegishliligi bo‘yicha topshiriqlar berildi.