Мактаблардаги тарбия ва маънавият, дарслардаги давоматни яхшилашга қаратилган манзилли ишлар Миллий гвардия қўмондони бошчилигидаги ишчи гуруҳ томонидан Сирдарё вилояти бўйлаб давом эттирилмоқда
Мазкур йўналишдаги манзилли ишлар жорий йилнинг 21 феврал куни Миллий гвардия қўмондони Р.Джураев, вилоят ҳокими А.Махмудалиев ҳамда соҳага оид мутасадди раҳбарлар билан биргаликда Сардоба туманидаги 16 ва 13-сонли мактабларда, шунингдек Гулистон шаҳридаги 8 ва 16-сонли мактабларда олиб борилди.
Дастлаб Сардоба туманидаги 16-сонли мактаб фаолияти билан танишилиб, унда барча сектор раҳбарлари, маҳалла еттилиги, туманнинг соҳага оид мутасаддилари, мактаб маъмурияти, ўқитувчилари ва психолог мутахассислари, шунингдек Миллий гвардиядан бириктирилган масъул ходимлар иштирок этишди. Ушбу мактабда шу куни 2 нафар дарс қолдирган ўқувчилар мисолида “мактаб-ота-она-маҳалла” занжири қай даражада йўлга қўйилганлиги кўриб чиқилиб, маҳалла раисларининг ҳаракати танқидий баҳоланди.
Шунингдек, мактаб директорининг фаоллиги ва шижоати туфайли ушбу муассасада яратилган шарт-шаройитлар, ўқувчиларнинг таълим-тарбия олишига бўлган иштиёқига ижобий таъсир кўрсатгани юқори баҳоланиб, Миллий гвардия қўмондони томонидан директор З.Нишонов муносиб рағбатлантирилди.
Ушбу туманда жойлашган 13-мактаб фаолиятига эса вилоят ҳокими томонидан қаттиқ эътироз билдирилиб, ўқувчиларнинг таълим-тарбияси ва давомати билан боғлиқ мавжуд муаммолар муассаса маъмурияти ва айрим ўқитувчиларнинг масъулиятсизлиги оқибатида юзага келганлиги таъкидланди. Шу сабаб соҳага оид мутасадди раҳбарлар ҳамда масъул ҳодимларга, сурункали дарс қолдирадиган ҳар бир ўқувчи ва уларнинг ота-оналари билан индивидуал ишлар олиб борилиши юзасидан топшириқлар юклатилди.
Юқорида таъкидлаганимиздек, Гулистон шаҳрида жойлашган 8 ва 16-сонли мактабларда таълим-тарбия ва давомати бўйича мавжуд муаммолар ва уларнинг ечими юзасидан мактаб ўқтиувчилари, инспектор-психологлар ва маҳалла еттилиги ўртасидаги ҳамкорлик масалалари Миллий гвардия қўмондони ҳамда вилоят ҳокими бошчилигида муҳокама қилинди.
Учрашув мобайнида 8-мактаб ўқувчиларининг давомати ва ўтган йил давомида вояга етмаганлар ўртасида қайд этилган ҳуқуқбузарлик ҳолатлари билан боғлиқ муаммолар таҳлил қилиниб, мактаб маъмурияти ва психолог мутахассисларнинг фаолиятига танқидий баҳо берилди.
Ушбу мактаб ўқувчилари ўртасида кузатилган ҳуқуқбузарликлар қайта ёд олиниб, Миллий гвардия қўмондони томонидан айрим ўқувчилар ходимларга номма-ном бириктирилди, шунингдек мактабларда хавфсиз муҳитни яратишга қаратилган ишлар доирасида қўриқловни янгича тизимда такомиллаштириш борасида амалга оширилаётган ишларга ҳам алоҳида урғу берилиб, масъулларга тегишлилиги бўйича топшириқлар берилди.
