Milliy gvardiya Toshkent Temurbeklar maktabida "Yosh gvardiyachilar" harbiy-sport musobaqasining respublika bosqichi bo‘lib o‘tmoqda.
Mamlakatimizda o‘quvchi yoshlarni Vatanga muhabbat, harbiy burchga sadoqat ruhida tarbiyalash, Milliy gvardiya bo‘linmalarida xizmat qilishga qiziqtirish va bosqichma-bosqich tayyorlab borish, o‘quvchi yoshlarda mardlik, jasurlik, shijoat va qatʼiyat tuyg‘ularni shakllantirish hamda Vatanga va Prezidentga sadoqat ruhida, Milliy gvardiyaning shonli va jangovar anʼanalarining davomchilari etib tarbiyalash borasida tizimli ishlar amalga oshirilmoqda.
Xususan, joriy yilning 20-22 may kunlari Milliy gvardiya Toshkent Temurbeklar maktabida o‘tkazilishi rejalashtirilgan "Yosh gvardiyachilar" harbiy-sport musobaqasiga bugun start berildi.
Mazkur musobaqada ishtirok etish uchun respublikadagi umumtaʼlim maktablarining 9-11 sinf o‘quvchilari orasidan jismonan sog‘lom, intellektual va intizom borasida eng faol o‘quvchilar orasidan jamoalar shakllantirildi.
Musobaqa qoidalariga ko‘ra o‘quvchi yoshlar, bilimdonlar bellashuvi, saf tayyorgarligi, ko‘rgazmali qo‘l jangi chiqishi, zaharlangan hududdan o‘tish, o‘q dorilarni belgilangan joyga yetkazish va o‘qdonga joylash, kamondan otish, suvli to‘siqdan o‘tish, birinchi tibbiy yordam ko‘rsatish kabi shartlar bo‘yicha o‘zaro bellashishmoqda.
Ushbu musobaqa Milliy gvardiya, Maktabgacha va maktab taʼlim vazirligi, Yoshlar ishlari agentligi, O‘zbekiston Yoshlar ittifoqi Markaziy va hududiy Kengashlari hamkorligida tashkillashtirildi.
