Milliy gvardiya Navoiy viloyati bo‘yicha boshqarmasining dala o‘quv poligonida batalyon komandirlarining tarbiyaviy va mafkuraviy ishlar bo‘yicha o‘rinbosarlari ishtirokida o‘quv-uslubiy yig‘in o‘tkazildi
2024 yilning 25-28 iyun kunlari O‘zbekiston Respublikasi Milliy gvardiyasi bo‘linmalarida tarbiyaviy va mafkuraviy ishlar samaradorligini oshirish, mutaxassislar hamda bo‘linmalarga yuklatilgan jangovar vazifalarni muvaffaqiyatli bajarish uchun zarur bo‘lgan ruhiy sifatlarni shakllantirish bo‘yicha Milliy gvardiya Navoiy viloyati bo‘yicha boshqarmasining dala o‘quv poligonida harbiy qism va muassasalarda batalyon komandirining tarbiyaviy va mafkuraviy ishlar bo‘yicha o‘rinbosarlarining nazariy bilimlari va amaliy ko‘nikmalarini yana-da mustahkamlashga qaratilgan o‘quv-uslubiy yig‘ini o‘tkazildi.
Harbiy xizmatchilar poligonda qad rostlagan dala o‘quv shaharchasida malakali mutaxassislardan maxsus operatsiyalarda axloqiy-ruhiy taʼminotni tashkillash tartibi, mafkuraviy informatsion xurujlarga qarshi psixologik immunitetni shakllantirish usullari, yoshlar va ayol harbiy xizmatchilarning oila aʼzolari bilan ishlash tizimini tubdan takomillashtirishga qaratilgan nazariy bilmlarni egallashdi.
Keyingi mashg‘ulotlar shaxsiy tarkibni o‘q otish tayyorgarligi jarayonida jangovar vaziyatlarga nisbatan ruhiy tayyorlash tartibi va xavfsizlik qoidalari hamda kunduzi va tunda o‘q otish meʼyorlarini bajarish bo‘ldi. Shuningdek, maxsus sunʼiy to‘siqli yo‘laklardan o‘tish, harbiy xizmatchilarni ekstremal vaziyatlardagi harakatlarga axloqiy-ruhiy tayyorlash usullari, jangovar vaziyatlarda tibbiy taʼminotni tashkil qilish va birinchi tez-tibbiy yordam ko‘rsatish tartibi, qo‘l jangi usullarini bajarish va psixologik to‘siqlardan iborat yerto‘la yo‘lagidan o‘tish, qorovul va sutkalik naryad, dala sharoitida ruhiy yengillik xonalarini jihozlash va undan foydalanish tartibi, xarita bilan ishlash ko‘nikmalari kabilarni amaliy jihatdan bajarib o‘tishdi.
O‘quv-yig‘inining uchinchi kunida to‘liq ekipirovkada 10 kilometr masofaga piyoda marsh yurish mashg‘uloti o‘tkazildi. Unda harbiy xizmatchilar yo‘l davomida turli to‘siqlardan o‘tib, qiyinchiliklarni yengib o‘tish ko‘nikmalarini hosil qilishdi. Finishga yetib kelgan barcha harbiy xizmatchilar jamoani jipslashtirish o‘yinlarida ishtirok etishdi. Bundan tashqari jismoniy tayyorgarlik bo‘yicha 3 kilometr va 100 metrga yugurish hamda turnikda tortinish bo‘yicha ham meʼyorlarni topshirishdi. Shundan so‘ng Milliy gvardiya bo‘linmalarida ishlab chiqilgan ilmiy-innovatsion va ratsionalizatorlik ishlanmalar ko‘rgazmasi o‘tkazildi. Unga kuch tuzilmalari harbiy xizmatchi va xodimlari ham taklif etildi.
4 kunlik o‘quv-yig‘ining yakunida barcha egallangan ko‘nikmalar muhokama qilindi va kelgusida amalga oshirilishi lozim bo‘lgan rejalar belgilab olindi.
