Миллий гвардия Навоий вилояти бўйича бошқармасининг дала ўқув полигонида батальон командирларининг тарбиявий ва мафкуравий ишлар бўйича ўринбосарлари иштирокида ўқув-услубий йиғин ўтказилди
2024 йилнинг 25-28 июнь кунлари Ўзбекистон Республикаси Миллий гвардияси бўлинмаларида тарбиявий ва мафкуравий ишлар самарадорлигини ошириш, мутахассислар ҳамда бўлинмаларга юклатилган жанговар вазифаларни муваффақиятли бажариш учун зарур бўлган руҳий сифатларни шакллантириш бўйича Миллий гвардия Навоий вилояти бўйича бошқармасининг дала ўқув полигонида ҳарбий қисм ва муассасаларда батальон командирининг тарбиявий ва мафкуравий ишлар бўйича ўринбосарларининг назарий билимлари ва амалий кўникмаларини янада мустаҳкамлашга қаратилган ўқув-услубий йиғини ўтказилди.
Ҳарбий хизматчилар полигонда қад ростлаган дала ўқув шаҳарчасида малакали мутахассислардан махсус операцияларда ахлоқий-руҳий таъминотни ташкиллаш тартиби, мафкуравий информацион хуружларга қарши психологик иммунитетни шакллантириш усуллари, ёшлар ва аёл ҳарбий хизматчиларнинг оила аъзолари билан ишлаш тизимини тубдан такомиллаштиришга қаратилган назарий билмларни эгаллашди.
Кейинги машғулотлар шахсий таркибни ўқ отиш тайёргарлиги жараёнида жанговар вазиятларга нисбатан руҳий тайёрлаш тартиби ва хавфсизлик қоидалари ҳамда кундузи ва тунда ўқ отиш меъёрларини бажариш бўлди. Шунингдек, махсус сунъий тўсиқли йўлаклардан ўтиш, ҳарбий хизматчиларни экстремал вазиятлардаги ҳаракатларга ахлоқий-руҳий тайёрлаш усуллари, жанговар вазиятларда тиббий таъминотни ташкил қилиш ва биринчи тез-тиббий ёрдам кўрсатиш тартиби, қўл жанги усулларини бажариш ва психологик тўсиқлардан иборат ертўла йўлагидан ўтиш, қоровул ва суткалик наряд, дала шароитида руҳий енгиллик хоналарини жиҳозлаш ва ундан фойдаланиш тартиби, харита билан ишлаш кўникмалари кабиларни амалий жиҳатдан бажариб ўтишди.
Ўқув-йиғинининг учинчи кунида тўлиқ экипировкада 10 километр масофага пиёда марш юриш машғулоти ўтказилди. Унда ҳарбий хизматчилар йўл давомида турли тўсиқлардан ўтиб, қийинчиликларни енгиб ўтиш кўникмаларини ҳосил қилишди. Финишга етиб келган барча ҳарбий хизматчилар жамоани жипслаштириш ўйинларида иштирок этишди. Бундан ташқари жисмоний тайёргарлик бўйича 3 километр ва 100 метрга югуриш ҳамда турникда тортиниш бўйича ҳам меъёрларни топширишди. Шундан сўнг Миллий гвардия бўлинмаларида ишлаб чиқилган илмий-инновацион ва рационализаторлик ишланмалар кўргазмаси ўтказилди. Унга куч тузилмалари ҳарбий хизматчи ва ходимлари ҳам таклиф этилди.
4 кунлик ўқув-йиғининг якунида барча эгалланган кўникмалар муҳокама қилинди ва келгусида амалга оширилиши лозим бўлган режалар белгилаб олинди.
