Milliy gvardiya Farg‘ona mintaqaviy o‘quv markazida 30 nafar bitiruvchilarga sertifikatlar topshirildi.
O‘zbekiston Respublikasi Milliy gvardiyasi Farg‘ona mintaqaviy o‘quv markazida boshlang‘ich tayyorgarlik dasturi bo‘yicha o‘qishni bitirgan 30 nafar tinglovchilar belgilangan reja asosidagi o‘quv kurslarini tamomladilar. O‘quv yig‘ini davomida malakali mutaxassislar ishtirokida amaliy seminar va treninglar, fakultativ mashg‘ulotlar hamda bir qator madaniy-maʼrifiy tadbirlar o‘tkazildi. Bundan ko‘zlangan asosiy maqsad ularning bilim va ko‘nikmalarini ham amaliy ham nazariy tarzda mustahkamlashdan iboratdir. O‘quv kurslarini muvaffaqiyatli tamomlagan bir guruh bitiruvchilarga tantanali sertifikatlar topshirish marosimi bo‘lib o‘tdi. So‘z olgan Markaz boshlig‘i polkovnik J.E.Mirzaliyev bitiruvchilarni tantanali qasamyod hamda sertifikat olganliklari shuningdek, o‘quv yig‘inini muvaffaqiyatli yakunlaganliklari bilan tabrikladi.
Shu bilan bir qatorda, ularga sihat-salomatlik, tinchlik-omonlik, xalqimiz osoyishtaligi yo‘lida olib borayotgan sharafli ishlarida ulkan zafarlar tiladi.
