Milliy gvardiya Maʼnaviyat va maʼrifat markazida tizimdagi bir guruh harbiy xizmatchi va xodimlarning farzandlariga imtiyozli tavsiyanomalarni tantanali topshirish marosimi bo‘lib o‘tdi.
Joriy yilning 19 may kuni Milliy gvardiya Maʼnaviyat va maʼrifat markazida tizimda faoliyat olib borayotgan bir guruh harbiy xizmatchi va xodimlarning farzandlariga oliy taʼlim muassasalariga o‘qishga kirishi uchun tavsiyanomalar topshirish marosimi bo‘lib o‘tdi.
Mazkur tadbir Milliy gvardiya qo‘mondonligi, Oliy taʼlim va innovatsiyalar vazirligi, Oliy majlis senati, Yoshlar ishlari agentligi hamda boshqa mutasaddi rahbarlar, shuningdek harbiy xizmatchi va xodimlar ishtirokida bo‘lib o‘tdi. Tadbirda namunali xizmat qilayotgan va soha ravnaqi uchun o‘zining munosib hissasini qo‘shib kelayotgan fidoyi xodimlarning 170 nafar farzandlariga imtiyozli tavsiyanomalar tantanali ravishda topshirildi.
Tadbirning rasmiy qismidan so‘ng, Alohida harbiy namunali-ko‘rgazmali orkestr jamoasi, Harbiy musiqa akademik litseyi o‘quvchilari, Maʼnaviyat va maʼrifat markazi ashula va raqs ansamblining xushovoz xonandalari tomonidan tayyorlangan konsert dasturi namoyish etildi.
Yoshlarga berilayotgan bu kabi imtiyoz va imkoniyatlar albatta, mamlakatimizda ularning kelajagi haqida g‘amxo‘rlik qilish masalalariga ustuvor darajada eʼtibor qaratilayotganligidan dalolatdir.
