Milliy gvardiya tizimida “Bilim — nurli kelajak poydevori” shiori ostida o‘tkazilgan ingliz tili viktorinasining g‘oliblari aniqlandi.
O‘zbekiston Respublikasi Milliy gvardiyasi Ma’naviyat va ma’rifat markazida Milliy gvardiya hududiy boshqarmalari, harbiy qismlar va ta’lim muassasalari terma jamoalari o‘rtasida an’anaviy tarzda o‘tkazib kelinayotgan ingliz tili viktorinasining respublika bosqichi bo‘lib o‘tdi.
Mazkur viktorinada O‘zbekiston davlat jahon tillari universiteti hamda Toshkent davlat sharqshunoslik universitetining malakali professor-o‘qituvchilari hay’at a’zolari sifatida ishtirok etib, bellashuv jarayoniga xolis va professional baho berdilar. Musobaqada O‘zbekiston Respublikasi Jamoat xavfsizligi universiteti, Milliy gvardiyaning Qoraqalpog’iston Respublikasi, Buxoro, Farg‘ona va Samarqand viloyatlari shuningdek, Toshkent shahri bo‘yicha boshqarmalari harbiy xizmatchilaridan tashkil topgan jamoalar bilan bir qatorda “Temurbeklar maktabi” harbiy-akademik litseyi hamda Milliy gvardiya Harbiy musiqa akademik litseyining iqtidorli o‘quvchilaridan iborat jamoalar ham munosib ishtirok etdi.
Viktorinada har biri 6 nafardan iborat 9 ta jamoa uch bosqichda — “Tanishtiruv”, “Savol-javob” va “Sardorlar bahsi” shartlari asosida o‘z bilim va salohiyatini namoyon etdi. Ishtirokchilarning ingliz tilini puxta egallagani, tarixiy va huquqiy bilimlarga ega ekani, shuningdek, mustaqil fikrlash va nutq madaniyatining yuqori darajada ekanligi hay’at a’zolari tomonidan alohida e’tirof etildi.
“Tanishtiruv” shartida jamoalar o‘z o‘quv muassasalari va harbiy qismlari haqida kreativ videoroliklar, taqdimotlar va sahnalashtirilgan chiqishlar orqali ma’lumotlar taqdim etdi. “Savol-javob” bosqichida esa ishtirokchilar O‘zbekiston tarixi, O‘zbekiston Respublikasi Konstitutsiyasi hamda milliy madaniyatga oid savollarga ingliz tilida batafsil javoblar berdilar. “Sardorlar bahsi”da esa jamoa sardorlari erkin mavzuda tayyorlab kelgan mavzularini keng yoritib berishdi.
Ishtirokchilarning yuqori tayyorgarligi, intellektual salohiyati va raqobatning keskinligi hay’at a’zolari uchun g‘oliblarni aniqlashda muayyan murakkablik tug‘dirdi. Shu o‘rinda ta’kidlash joizki, avvalgi uch yil davomida ingliz tili viktorinasida O‘zbekiston Respublikasi Jamoat xavfsizligi universiteti jamoasi ketma-ket g‘oliblikni qo‘lga kiritib kelgan bo‘lsa, joriy yilda ushbu an’anani Toshkent “Temurbeklar maktabi” harbiy-akademik litseyining “Young Temurids” jamoasi munosib tarzda davom ettirib, musobaqaning mutlaq g‘olibiga aylandi. Bu holat yoshlar o‘rtasida sog‘lom raqobat, uzluksiz izlanish va bilimga intilish tobora kuchayib borayotganidan dalolat beradi.
Yakuniy natijalarga ko‘ra, uchinchi o‘rin Toshkent viloyatidan ishtirok etgan “Renessans” jamoasiga, ikkinchi o‘rin esa O‘zbekiston Respublikasi Jamoat xavfsizligi universitetining “The Invincibles” jamoasiga nasib etdi.
Viktorina yakunida g‘olib va sovrindor jamoalar kubok hamda qimmatbaho sovg‘alar bilan taqdirlandi. Shuningdek, bellashuvda faol ishtirok etgan jamoalar turli nominatsiyalar bo‘yicha rag‘batlantirildi. Jamoalar bilimini baholashda jonbozlik ko‘rsatgan hay’at a’zolariga Milliy gvardiya qo‘mondonligining tashakkurnomalari topshirildi.
Mazkur viktorina yana bir bor shuni yaqqol namoyon etdiki, Yangi O‘zbekiston yoshlari — bilimli, zukko, tashabbuskor va zamonaviy tafakkur egalaridir. Ularning chuqur bilimga intilishi, xorijiy tillarni puxta egallashi va yuksak ma’naviyatga ega bo‘lishi mamlakatimiz kelajagi uchun mustahkam poydevor bo‘lib xizmat qiladi.
